മലയാളികളുടെ കണ്ണീര്‍ എന്‍റേയും കണ്ണീരാണ്: ജാനകിയമ്മ

കൊച്ചി: കേരളത്തോളം എന്നെ സ്നേഹിച്ചവരില്ല. മലയാളികളുടെ കണ്ണീര്‍ എന്‍റേയും കണ്ണീരാണ്. ചങ്ക് പിടഞ്ഞ് പറയുകയാണ് ഗാനകോകിലം എസ്. ജാനകി എന്ന ജാനകിയമ്മ. പ്രളയക്കെടുതിയുടെ ദൃശ്യങ്ങൾ ടെലിവിഷനിൽ കണ്ടശേഷമുള്ള വേദന എസ്.ജാനകിയമ്മ പങ്കുവെച്ചിരിക്കുന്നത് മാധ്യമപ്രവര്‍ത്തകൻ രവി മേനോനോടാണ്. അദ്ദേഹം തന്നെയാണ് ഫേസ്ബുക്കിലൂടെ ഇത് പുറത്ത് വിട്ടിരിക്കുന്നത്.

``നമ്മുടെ കേരളത്തിലാണോ ഇതൊക്കെ? വിശ്വസിക്കാൻ കഴിയുന്നില്ല..'' വിതുമ്പലിനിടയിലൂടെ ജന്മം കൊണ്ട് മലയാളിയല്ലെങ്കിലും മനസ്സ് കൊണ്ട് എന്നും മലയാളിയായ ജാനകിയമ്മ പറയുന്നു. ടി.പിയിൽ പ്രളയദൃശ്യങ്ങളിൽ കണ്ട പല സ്ഥലങ്ങളിലും വന്ന് പാടിയിട്ടുണ്ട്. ``ഓരോ പുഴയുടെയും പേര് കേൾക്കുമ്പോൾ ഞെട്ടും. ഈ പുഴയെ കുറിച്ച് പാടിയിട്ടുണ്ടല്ലോ എന്നോർക്കും. മണിമലയാർ, പമ്പ, പിന്നെ പേരാറും പെരിയാറും കിള്ളിയാറും ഭാരതപ്പുഴയും കല്ലായിപ്പുഴയും എല്ലാം..... സൗമ്യമായി ഒഴുകുന്ന ആ പുഴകൾക്ക് ഇങ്ങനെയും ഒരു ഭാവമുണ്ടല്ലേ?', ജാനകിയമ്മയുടെ വാക്കുകള്‍.

സ്വതസിദ്ധമായ നിഷ്കളങ്കതയോടെ ജാനകിയമ്മ പറഞ്ഞു.. ``മലയാളികളോളം എന്നെ സ്നേഹിച്ചവരുണ്ടാവില്ല. അവരുടെ കണ്ണീർ എന്റെയും കണ്ണീരാണ്. ഇവിടെ ഹൈദരാബാദിലിരുന്ന് നിങ്ങളുടെ ദുഃഖത്തിൽ പങ്കുകൊള്ളുന്നതിൽ അർത്ഥമില്ല എന്നറിയാം. അല്ലാതെ ഞാൻ എന്തുചെയ്യും? വരണമെന്നുണ്ട്. ആരോഗ്യം അനുവദിക്കുന്നില്ല. എന്റെ മനസ്സ് എപ്പോഴും നിങ്ങൾക്കൊപ്പമുണ്ടാകും. പ്രാർത്ഥനകളും. ഇവിടെയിരുന്ന് എനിക്കതല്ലേ കഴിയൂ...വെന്നായിരുന്നു ജാനകിയമ്മയ്ക്ക് പറയാനുണ്ടായിരുന്നതെന്ന് രവി മേനോൻ പറയുന്നു.