യേശുവും ബാറ്റ്മാനുമൊക്കെയായ ക്രിസ്റ്റ്യൻ ബെയ്ൽ വീണ്ടും

ക്രിസ്റ്റ്യൻ ബെയ്ൽ ഒരു സംഭവമാണ്. പരകായപ്രവേശത്തിൽ ബെയ്‍ലിനെ കഴിഞ്ഞേ ഉള്ളൂ മറ്റ് നടന്മാര്‍. അദ്ദേഹം മറ്റൊരാളായി മാറുന്നതിന്‍റെ ഏഴയലത്ത് എത്താൻ മറ്റു അഭിനേതാക്കൾക്ക് കഴിയില്ല എന്നത് പല ചിത്രങ്ങളിലൂടെ തെളിയിച്ചതാണ്. 13-ആം വയസിൽ സ്റ്റീവൻ സ്പിൽബർഗിന്‍റെ എമ്പയർ ഓഫ് ദ സണ്ണിലെ കേന്ദ്ര കഥാപാത്രത്തെ അവതരിപ്പിച്ചുകൊണ്ട് ഞെട്ടിച്ചയാളാണ് ബെയ്ൽ.

മേരി, മദര്‍ ഓഫ് ജീസസ് എന്ന സിനിമയിൽ യേശുക്രിസ്തുവായും ഡാർക്ക് നൈറ്റ് ത്രയത്തിലെ ബാറ്റ്മാനായും മെഷീനിസ്റ്റിലെ ട്രെവർ റെസ്നിക്കായുമൊക്കെ അമ്പരപ്പിച്ചിട്ടുണ്ട് ബെയ്ൽ. ഇപ്പോഴിതാ 'വൈസ്' എന്ന സിനിമയുടെ ട്രെയിലറിൽ അമേരിക്കയുടെ ഏറെ പ്രശസ്തനായിരുന്ന വൈസ് പ്രസിഡന്‍റ് ഡിക് ചെനിയായി ബെയ്‍ലിന്‍റെ വേഷപകര്‍ച്ച ഏറെ ചര്‍ച്ചയാവുകയാണ്.

കിറുകൃത്യമാണ് ബെയ്‍ലിന്‍റെ കാസ്റ്റിങ് എന്ന് ഏവരും പ്രശംസിക്കുകയുമാണ്. സംസാരവും വേഷപകര്‍ച്ചയും നോട്ടവും ശൈലിയുമെല്ലാം ഡിക് ചെനിന്‍റേതുപോലെതന്നെ തോന്നിപ്പിക്കുന്നതാണെന്ന് ഏവരും ഒരേ സ്വരത്തിൽ പറയുന്നു. അമേരിക്കൻ പ്രസിഡന്‍റായിരുന്ന ജോർജ്ജ് ബുഷ് ആയി സിനിമയിൽ വേഷം ഇടുന്നത് സാം റോക്ക്‌വെൽ ആണ്. കൂടാതെ സ്റ്റീവ് കാരൽ, എയ്മി ആഡംസ് തുടങ്ങിയവരും ചിത്രത്തിലുണ്ട്. മുമ്പ് മികച്ച തിരക്കഥയ്ക്കുള്ള ഓസ്കാർ നേടിയിട്ടുള്ള 'ദി ബിഗ് ഷോർട്ട്' ന്‍റെ അണിയറയിൽ ഉള്ളവർ തന്നെയാണ് വൈസ് എന്ന ഈ ചിത്രവും ഒരുക്കുന്നത്.