എനിക്കേറ്റവും പ്രിയപ്പെട്ടയാള്‍! എന്നും സന്തോഷത്തോടെയും സമാധാനത്തോടെയും ഇരിക്കട്ടെ! നയന്‍താരയുടെ അമ്മയ്ക്ക് പിറന്നാളാശംസയുമായി വിഘ്‌നേഷ് ശിവന്‍

സംവിധായകനായ വിഘ്‌നേഷ് ശിവന്‍ സോഷ്യല്‍മീഡിയയില്‍ സജീവമാണ്. സിനിമയെക്കുറിച്ച് മാത്രമല്ല വ്യക്തി ജീവിതത്തിലെ വിശേഷങ്ങളും അദ്ദേഹം സോഷ്യല്‍മീഡിയയിലൂടെ പങ്കിടാറുണ്ട്. നീണ്ടനാളത്തെ പ്രണയത്തിനൊടുവില്‍ അടുത്തിടെയായിരുന്നു വിഘ്‌നേഷും നയന്‍താരയും വിവാഹിതരായത്. പ്രണയത്തിലാണെന്ന് വിഘ്‌നേഷ് വ്യക്തമാക്കിയെങ്കിലും നയന്‍താര അതേക്കുറിച്ച് പ്രതികരിച്ചിരുന്നില്ല. ആരേയും അറിയിക്കാതെ വിവാഹം നടത്തില്ലെന്നായിരുന്നു താരം പറഞ്ഞത്. വിവാഹത്തീയതി മുതല്‍ പിന്നീടങ്ങോട്ടുള്ള വിശേഷങ്ങളെല്ലാം സോഷ്യല്‍മീഡിയയിലുണ്ടായിരുന്നു. വിഘ്‌നേഷും സന്തോഷം പങ്കുവെച്ചെത്തിയിരുന്നു.
വിവാഹത്തിന് ശേഷമായി ഇരുവരും വിദേശത്തേക്ക് പോയിരുന്നു. യാത്രയ്ക്കിടയിലെ ചിത്രങ്ങളും അദ്ദേഹം പങ്കിട്ടിരുന്നു. നയന്‍താരയുടെ അമ്മ ഓമന കുര്യന് പിറന്നാളാശംസ അറിയിച്ചുള്ള പോസ്റ്റ് വൈറലായിക്കൊണ്ടിരിക്കുകയാണിപ്പോള്‍. ഹാപ്പി ബര്‍ത്ത് ഡേ ഡിയര്‍ ഓമന കുര്യന്‍. എന്റെ മറ്റൊരു അമ്മ, എനിക്കൊരുപാട് ഇഷ്ടമുള്ള സ്ത്രീയാണ്. മനോഹരമായ ഹൃദയവും ആത്മാവുള്ളയാള്‍. എന്നും സന്തോഷത്തോടെയും സമാധാനത്തോടെയും ഇരിക്കാന്‍ ദൈവത്തോട് പ്രാര്‍ത്ഥിക്കുന്നു എന്നുമായിരുന്നു വിഘ്‌നേഷ് കുറിച്ചത്. അമ്മയെ നെഞ്ചോട് ചേര്‍ത്ത് പിടിച്ച് നില്‍ക്കുന്ന ഫോട്ടോയും വിഘ്‌നേഷ് പോസ്റ്റ് ചെയ്തിരുന്നു. താരങ്ങളും ആരാധകരുമടക്കം ഇതിനകം ഒരുലക്ഷത്തിലധികം പേരാണ് പോസ്റ്റ് ലൈക്ക് ചെയ്തിട്ടുള്ളത്.
അമ്മയ്‌ക്കൊപ്പമുള്ള ചിത്രങ്ങള്‍ നേരത്തെയും വിഘ്‌നേഷ് പങ്കുവെച്ചിരുന്നു. സിനിമാതിരക്കുകളിലാണെങ്കിലും അമ്മയെ കാണാനായെത്താറുണ്ട് നയന്‍താരയ്ക്ക്. വിവാഹത്തിന് മുന്‍പ് തന്നെ വിഘ്‌നേഷും അമ്മയെ കാണാനായെത്തിയിരുന്നു. അമ്മയുടെ പിറന്നാളാഘോഷത്തിന്റെ ചിത്രങ്ങളെല്ലാം പങ്കുവെച്ചിരുന്നു. മലയാളത്തിലൂടെ തുടക്കം കുറിച്ച് തെന്നിന്ത്യയുടെ സ്വന്തം താരമായി മാറുകയായിരുന്നു നയന്‍താര. സിനിമ സ്വീകരിക്കുന്നതിലായാലും മറ്റ് കാര്യങ്ങളിലായാലും സ്വന്തം നിലപാടുകള്‍ കൃത്യമായി വ്യക്തമാക്കാറുണ്ട് താരം. വിവാഹ ശേഷമായി ഗ്ലാമറസ് റോളുകള്‍ ചെയ്യില്ലെന്ന തീരുമാനത്തിലാണ് താരമെന്നുള്ള റിപ്പോര്‍ട്ടുകളും പുറത്തുവന്നിരുന്നു.