തെലുങ്കിലും കസറാൻ ഒരുങ്ങി വിജയ് സേതുപതി

കോളിവുഡിൽ പേരെടുത്ത വിജയ് സേതുപതിയുടെ അഭിനയപാടവം ഇപ്പോൾ മലയാള സിനിമയിലേക്കും തെലുങ്ക് സിനിമകളിലേക്കുമായി നീളുകയാണ്. മലയാളത്തിൽ ജയറാമിനൊപ്പം നായക തുല്യ കഥാപാത്രത്തെ അവതരിപ്പിച്ചാണ് വിജയ് സേതുപതി മോളിവുഡിലേക്കെത്തുന്നത്. അതേസമയം തെലുങ്കിൽ ചിരഞ്ജീവിക്കൊപ്പമാണ് വിജയ് സേതുപതിയുടെ അരങ്ങേറ്റം.

'സൈ നരസിംഹ റെഡ്ഢി' എന്ന പീരീഡ് ഡ്രാമയിലാണ് ഇരുവരും ഒന്നിക്കുന്നത്. സ്വാതന്ത്ര്യ സമര സേനാനി ആയ നരസിംഹ റെഡ്ഢി ആയി ചിരഞ്ജീവിയാണ് എത്തുന്നത്. ആദ്യ സ്വാതന്ത്ര്യ സമര കലാപം നടന്ന 1857 നും പത്തു വർഷങ്ങൾക്ക് മുൻപ് തന്നെ ബ്രിട്ടീഷുകാർക്ക് എതിരെ പട നയിച്ച പോരാളിയാണ് നരസിംഹ റെഡ്ഢി. സുരീന്ദർ റെഡ്ഢി ആണ് ചിത്രം സംവിധാനം ചെയ്യുന്നത്. ലേഡി സൂപ്പർസ്റ്റാർ നയൻ‌താരയാണ് ചിത്രത്തിൽ നായികാ വേഷത്തിൽ എത്തുന്നത്. ചിത്രത്തിൽ തമന്നയും നാനിയും മുഖ്യ വേഷങ്ങളിൽ അഭിനയിക്കുന്നു. ചിത്രത്തിൻ്റെ ഷൂട്ടിംഗ് പുരോഗമിക്കുകയാണ്.

ബിഗ് ബഡ്ജറ്റിലൊരുങ്ങുന്ന ചിത്രം ചിരഞ്ജീവിയുടെ മകൻ രാം ചരൺ ആണ് നിര്‍മ്മിക്കുന്നത്. ചിത്രത്തിൽ രാം ചരനും ഒരു പ്രധാന വേഷത്തിൽ എത്തുന്നുണ്ടെന്നാണ് വിവരം. അമിതാഭ് ബച്ചനും ചിത്രത്തിലുണ്ട്. കോടികളാണ് ചിത്രത്തിനായി മുടക്കുന്നത്. വൻ മുതൽ മുടക്കിൽ യുദ്ധ രംഗങ്ങൾ വരെ ചിത്രത്തിലുൾപ്പെടുത്തിയിട്ടുണ്ട്. കേവലം 8 മിനിറ്റ് ദൈർഘ്യമുള്ള ആക്ഷൻ രംഗത്തിനായി ചെലവഴിക്കുന്നത് 54 കോടി രൂപയോളമാണ്.