ആ മൂന്ന് പേര്‍ക്കും ഒന്നിച്ച് അവാര്‍ഡ് പ്രഖ്യാപിച്ചപ്പോള്‍ കണ്ണുനിറഞ്ഞുപോയി! ശ്രീനിവാസന്‍ ഇമോഷണലായ സന്ദര്‍ഭത്തെക്കുറിച്ച് വിമല ടീച്ചര്‍

വ്യത്യസ്തമായ കഥാപാത്രങ്ങളിലൂടെയായി മലയാളികള്‍ക്ക് പ്രിയങ്കരനായി മാറിയതാണ് ശ്രീനിവാസന്‍. അഭിനയത്തിന് പുറമെ എഴുത്തിലും സംവിധാനത്തിലുമെല്ലാം അദ്ദേഹം കഴിവ് തെളിയിച്ചിരുന്നു. ജീവിതത്തിലെ വലിയൊരു പ്രതിസന്ധിയെ നേരിട്ട് തിരിച്ചെത്തിയിരിക്കുകയാണ് അദ്ദേഹം. മഴവില്‍ മനോരമയും അമ്മയും നടത്തിയ പരിപാടിയിലേക്ക് ശ്രീനിവാസനും ഭാര്യയും എത്തിയിരുന്നു. അതീവ സന്തോഷത്തോടെയായാണ് ശ്രീനിവാസനെ സഹപ്രവര്‍ത്തകര്‍ സ്വാഗതം ചെയ്തത്. വേദിയിലെത്തിയ ശ്രീനിയെ വാരിപ്പുണരുകയായിരുന്നു മോഹന്‍ലാല്‍. കണ്ടപ്പോള്‍ ഒരു ചുംബനം കൊടുക്കാനായാണ് തോന്നിയതെന്നായിരുന്നു മോഹന്‍ലാല്‍ പറഞ്ഞത്. ഇനിയും പവിഴമല്ലികള്‍ പൂക്കുമെന്നും ശ്രീനിയുടെ സിനിമകള്‍ വരുമെന്നുമായിരുന്നു സത്യന്‍ അന്തിക്കാട് പറഞ്ഞത്.
വിനീത് ശ്രീനിവാസന്‍ സംവിധാനം ചെയ്ത ഹൃദയത്തിന് നിരവധി പുരസ്‌കാരങ്ങള്‍ ലഭിച്ചിരുന്നു. വിനീതിനും പ്രണവിനും കല്യാണിക്കും ഒന്നിച്ച് പുരസ്‌കാരം പ്രഖ്യാപിക്കുന്നത് കണ്ടപ്പോള്‍ ശ്രീനിയേട്ടന്റെ കണ്ണുനിറഞ്ഞുപോയെന്ന് വിമല ടീച്ചര്‍ പറയുന്നു. വനിതയ്ക്ക് നല്‍കിയ അഭിമുഖത്തിലായിരുന്നു ഇരുവരും വിശേഷങ്ങള്‍ പങ്കുവെച്ചത്. പൊതുവെ അങ്ങനെ ഇമോഷണലാവുന്ന ആളല്ല ശ്രീനിയേട്ടന്‍. പഴയ കാര്യങ്ങളൊക്കെ ഓര്‍ത്താണ് ഇമോഷണലായതെന്നായിരുന്നു ശ്രീനിവാസന്‍ പറഞ്ഞത്.
ഇങ്ങനെയൊരു സന്ദര്‍ഭം ജീവിതത്തില്‍ ഇതുവരെ പ്രതീക്ഷിച്ചില്ലെന്നായിരുന്നു മോഹന്‍ലാലും പ്രിയദര്‍ശനും പറഞ്ഞത്. ഒരുകാലത്തെ ഹിറ്റ് മേക്കേഴ്‌സിന്റെ മക്കള്‍ സിനിമയ്ക്കായി ഒന്നിച്ചപ്പോള്‍ പിറന്നതും സൂപ്പര്‍ഹിറ്റ് ചിത്രമായിരുന്നു. പാട്ടിലൂടെയായി സിനിമയിലേക്കെത്തിയ വിനീത് സംവിധാനത്തിലും നിര്‍മ്മാണത്തിലും കൈവെക്കുകയായിരുന്നു പിന്നീട്. പ്രണവിനും കല്യാണിക്കുമൊപ്പമായി വിനീത് എത്തുന്നുവെന്ന് കേട്ടപ്പോള്‍ മുതല്‍ എല്ലാവരും പ്രതീക്ഷയിലായിരുന്നു. ക്യാംപസ് പശ്ചാത്തലത്തിലൊരുക്കിയ ഹൃദയത്തിന് ഗംഭീര സ്വീകരണമായിരുന്നു ലഭിച്ചത്. ഹൃദ്യമായിരുന്നു ഹൃദയം എന്നായിരുന്നു എല്ലാവരും പറഞ്ഞത്.