ഇന്നായിരുന്നു ആ സംഭവമെങ്കിൽ അവരെ വെടിവച്ചു കൊന്നേനേ; 'പട'യെക്കുറിച്ച് വിനായകൻ

ഇന്നാണ് ആ സംഭവമെങ്കിൽ എൻഎസ്ജി അവിടെ ലാൻഡ് ചെയ്ത് നാല് പേരെയും വെടിവച്ച് കൊല്ലും. റോഡ് മാർഗം എൻഎസ്ജി അന്ന് വാളയാർ വരെ എത്തിയിരുന്നു എന്നാണ് അറിയാൻ കഴിഞ്ഞത്. ഇന്നായിരുന്നുവെങ്കിൽ വെടിയുണ്ടകൾ എപ്പോഴെ അവിടെ എത്തിയേക്കും. അത്രത്തോളം എല്ലാം മാറി പോയെന്ന് വിനായകൻ മനോരമ ഡോട്ട്കോമിനോട് പറഞ്ഞു.

വിഷയം ആ സമയത്ത് തന്നെ ഞാൻ അറിഞ്ഞിരുന്നതാണ്. കഥ കേട്ടപ്പോൾ പിന്നെ താൽപര്യമായി. ആ കഥാപാത്രവും വലിയ ഇഷ്ടമാണ്. കൂടെ അഭിനയിച്ചവർ എല്ലാം നല്ല സുഹൃത്തുക്കളാണ്. ആ ബന്ധം കഥാപാത്രത്തിന്റെ പൂർണതയിലേക്കെത്താൻ സഹായിച്ചു. ഞങ്ങൾ ഒരുമിച്ചു കൂടുമ്പോൾ തന്നെ വലിയൊരു പടയായി. പടയുടെ ഒരുക്കങ്ങളും പട പടായെന്നായിരുന്നുവെന്ന് വിനായകൻ മനോരമയോട് പറഞ്ഞു.

'പട' സമൂഹം ചർച്ച ചെയ്യണം. പ്രായഭേദമന്യേ അവർ സംസാരിക്കട്ടെ. ഇതിലൂടെ സർക്കാരുകളുടെ രീതിയിലും മാറ്റം വരും. സംഘടന രാഷ്ട്രീയത്തിൽ നിന്നും ജനം മാറി ചിന്തിച്ചിരിക്കുന്നു. ഇത് സമൂഹത്തിന്റെ നന്മയുടെ ഭാഗമാണെന്നും വിനായകൻ പറയുന്നു. സംഘടനയിലേക്ക് ജനം കടക്കുന്നത് തെരഞ്ഞെടുപ്പുകളിൽ മാത്രമാണ്. കല്ലെറിയുന്ന സമരമുറകളിൽ നിന്ന് ഇപ്പോൾ ഒരുപാട് മാറ്റമുണ്ട്. ഡിജിറ്റൽ യുഗത്തിൽ ഇനിയുണ്ടാവുക ഡിജിറ്റൽ സമരങ്ങളായിരിക്കും. നീതിക്കു വേണ്ടിയുള്ള സമരങ്ങൾ എന്നും ഉണ്ടാകും. അത് വേറെ തലത്തിൽ മാത്രമാകും എന്ന് വിനായകൻ പറഞ്ഞു.

സ്റ്റൈലായി അഭിനയിക്കാൻ എനിക്ക് ഇഷ്ടമാണ്. അങ്ങനെയുള്ള പടങ്ങളും വരാറുണ്ട്. അതിലൊന്നും ഒരു പൂർണത തോന്നിയിട്ടില്ല. അതുകൊണ്ട് അത്തരം സിനിമകൾ സമയം എടുത്ത് ചെയ്യുന്നു. അതേസമയം പച്ചയായ ജീവിതം സിനിമയാകുമ്പോൾ അത് ജനങ്ങളിലേക്ക് ഇറങ്ങി ചെല്ലും. ജീവിതത്തിലെ നായകൻമാരെ കുറിച്ച് സിനിമ വരുമ്പോൾ ജനം അത് വീണ്ടും ആസ്വദിച്ച് തുടങ്ങുന്നുവെന്നും വിനായകൻ പറഞ്ഞു.