'അരവിന്ദനും' 'തൊബാമ'യും നാളെ; വിനീത് അൽഫോൻസിനോട് പറഞ്ഞത്

വിനീത് ശ്രീനിവാസൻ നായകനാകുന്ന 'അരവിന്ദന്‍റെ അതിഥികളും' അൽഫോൻസ് പുത്രൻ അവതരിപ്പിക്കുന്ന പ്രേമം ടീമിന്‍റെ പുതിയ ചിത്രം തൊബാമയും നാളെ തീയേറ്ററുകളിലെത്തുകയാണ്. അതിനിടെയാണ് ഇരുവരും തമ്മിലുള്ള സൈബര്‍ സംഭാഷണം ശ്രദ്ധേയമാകുന്നത്. അല്‍ഫോന്‍സ് നിര്‍മ്മിച്ച തൊബാമയെക്കുറിച്ചുള്ള ഫേസ്ബുക്ക് പോസ്റ്റിന് താഴെ വിനീത് കമന്‍റിട്ടതിങ്ങനെ. നിന്‍റെ പടം ഞാന്‍ കാണും, എന്‍റെ പടം നീയും കാണണേ.

അൽഫോൻസ് പുത്രന്‍റെ ഫേസ്ബുക്ക് കുറിപ്പിന്‍റെ പൂ‍ണ രൂപം കാണാം

''നാളെ avengers എന്ന സിനിമയും ഇറങ്ങുന്നുണ്ട് . അതിൽ അഭിനയിക്കുന്ന Robert Downey Jr വാങ്ങുന്ന പ്രതിഫലത്തിന്‍റെ 7il ഒന്ന് മാത്രമാണ് ഞങ്ങളുടെ സിനിമയുടെ total budget . തൊബാമയിൽ സൂപ്പർ heroes ഇല്ല ... പക്ഷെ സാധാരണ ഹീറോസ് ഉണ്ട് ... നല്ല ചങ്കോറപ്പൊള്ള നടന്മാരുണ്ട്.
കഥാപാത്രങ്ങൾക്കു വേണ്ടി നല്ലോണം പണിയെടുത്ത ഒരുപാട് ആൾക്കാര് ഈ സിനിമയിൽ ഉണ്ട്.
പിന്നെ പുതുമ... അത് പ്രതീക്ഷിക്കരുത്''

ഷറഫുദ്ദീന്‍, കൃഷ്ണ ശങ്കര്‍, സിജു വില്‍സണ്‍ എന്നിവരെ പ്രധാന കഥാപാത്രങ്ങളാക്കി മൊഹ്സിന്‍ കാസിം അണിയിച്ചൊരുക്കുന്ന ചിത്രമാണ് തൊബാമ. നാളെയാണ് ചിത്രം തീയേറ്റുകളിലെത്തുന്നത്. പതിയാറ എന്റർടെയിൻമെൻസിന്‍റെ ബാനറിൽ പ്രദീപ് കുമാർ പതിയാറ നിർമ്മിച്ച് എം. മോഹനൻ സംവിധാനം ചെയ്യുന്ന ചിത്രമാണ് 'അരവിന്ദൻ്റെ അതിഥികൾ'. ചിത്രത്തിൽ വിനീതിന്‍റെ നായികയായെത്തുന്നത് നിഖില വിമലാണ്. ഉർവശിയും, ശാന്തീകൃഷ്ണയും വർഷങ്ങളുടെ ഇടവേളയ്ക്കു ശേഷം വീണ്ടും ഒന്നിക്കുന്ന ഈ ചിത്രത്തിൽ ഒരു മുഖ്യ കഥാപാത്രമായി ശ്രീനിവാസനും എത്തുന്നു.

സലിം കുമാർ, അജു വർഗ്ഗീസ്, ഷമ്മിതിലകൻ, ദേവൻ, ബൈജു, ബിജുക്കുട്ടൻ, സുബീഷ് സുധി, നിയാസ് ബക്കർ, KPAC ലളിത, സ്നേഹ ശ്രീകുമാർ തുടങ്ങിയവരാണ് മറ്റു താരങ്ങൾ. രാജേഷ് രാഘവൻ രചന നിർവ്വഹിക്കുന്ന ഈ ചിത്രത്തിന്‍റെ ഛായാഗ്രഹണം സ്വരൂപ് ഫിലിപ്പാണ്. ഷാൻ റഹ്‌മാൻ ആണ് സംഗീതം.