രാമലീല കണ്ട് അഭിപ്രായവുമായി വിനീത് ശ്രീനിവാസൻ

നല്ലൊരു സിനിമാസ്വാദകനാണ് വിനീത് ശ്രീനിവാസൻ എന്നതിൽ ഒരു സംശയവുമില്ല. ഓരോ സിനിമ കാണുമ്പോഴും അതിലിഷ്ടപ്പെട്ട കാര്യങ്ങൾ വിനീത് ആരാധകരുമായി പങ്കുവയ്ക്കാറുണ്ട്. രാമലീല കണ്ടിട്ടുള്ള അഭിപ്രായമാണ് ഏറ്റവും ഒടുവിലായി ഫേസ്ബുക്കിൽ പങ്കുവച്ചിരിക്കുന്നത്. വിനീത് ഫേസ്ബുക്കിൽ കുറിച്ചിത് ഇങ്ങനെ:

രാമലീല കണ്ട് മടങ്ങി വന്നതെയുള്ളൂ. ഏതൊരു സംവിധായകനും എഴുത്തുകാരനും ചെയ്യാൻ ബുദ്ധിമുട്ടുള്ള ഒരു തീമെടുത്ത്, അത് അതിന്‍റെ മികവോടെ ചെയ്തു എന്നാണ് രാമലീലയെ കുറിച്ച് ഒറ്റവാക്കിൽ വിനീത് പറഞ്ഞത്. ഒരു നവാഗത സംവിധായകന്‍റെ അനുഭവം പ്രേക്ഷകരിലേക്ക് പകർന്നു നൽകുന്നതിൽ സിനിമ വിജയിച്ചു. സച്ചിയുടെ തിരക്കഥയെയും ഷാജിയുടെ ഛായാഗ്രഹണത്തെയും ഗോപി സുന്ദറിന്‍റെ സംഗീതത്തെയും വിനീത് പ്രശംസിച്ചു.

രാമനുണ്ണി എന്ന കഥാപാത്രത്തെ വളരെ തന്മയത്തത്തോടെയാണ് ദീലിപേട്ടൻ അവതരിപ്പിച്ചിരിക്കുന്നത്. ദിലീപേട്ടൻ വളരെ നിയന്ത്രണത്തോടെയാണ് ആ കഥാപാത്രത്തെ കൈകാര്യം ചെയ്തിരിക്കുന്നതും. ദൃശ്യത്തിന് ശേഷം മറ്റൊരു ഇടിവെട്ട് പെർഫോമൻസുമായി ഷാജോൺ ചേട്ടൻ തന്നെ ഞെട്ടിച്ചു എന്നാണ് വിനീത് പറയുന്നത്. മലയാള സിനിമയുടെ സ്വത്താണ് ഷാജോൺ. പ്രയാഗ, വിജയരാഘവൻ, രാധിക ഇവർ ഓരോരുത്തരും അവരവരുടെ കഥാപാത്രങ്ങളോട് നീതിപുലർത്തിയിട്ടുണ്ട്.

ഈ വർഷത്തെ ഏറ്റവും വലിയ സർപ്രൈസ് എന്നാണ് രാമലീല കണ്ടതിന് ശേഷം വിനീത് അഭിപ്രായപ്പെട്ടിരിക്കുന്നത്. ഈ സമയത്ത് സിനിമ റിലീസ് ചെയ്യാൻ നിമാതാവ് ടോമിച്ചൻ മുളകുപാടം കാണിച്ച ധൈര്യത്തെയും വിനീത് പ്രശംസിച്ചു. സിനിമ എന്നു പറയുന്നത് ഒരു മാജിക്കാണ്. അത് നമ്മുടെ കൈകളിൽ ഒതുങ്ങുന്നതിലും അപ്പുറമാണ്. അത് സൃഷ്ടിച്ചവന്‍റെ കഴിവിനും അപ്പുറത്തുള്ളതാണ് എന്നു പറഞ്ഞുകൊണ്ടാണ് വിനീത് തന്‍റെ ഫേസ്ബുക്ക് പോസ്റ്റ് അവസാനിപ്പിച്ചത്.



Vineeth Sreenivasan Facebook post

Vineeth Sreenivasan shares his opinion about Ramaleela through Facebook.