സ്വയം ഇപ്രൂവ് ചെയ്യാന്‍
സോഷ്യല്‍മീഡിയയിലെ കാര്യങ്ങളൊന്നും എന്നെ സ്വാധീനിക്കാറില്ല. നെഗറ്റീവ് കമന്റാണെങ്കില്‍ അതില്‍ കാര്യമുണ്ടോയെന്ന് നോക്കാറുണ്ട്. ശ്രദ്ധിക്കേണ്ട കാര്യമാണെന്ന് മനസിലാക്കിയാല്‍ സ്വയം ഇപ്രൂവ് ചെയ്യാനായി ശ്രമിക്കാറുണ്ട്. ഞാന്‍ പോലും അറിയാതെ സംഭവിച്ച വീഴ്ചകളെക്കുറിച്ച് മനസിലാക്കുന്നത് ഇത്തരത്തിലുള്ള അഭിപ്രായങ്ങളിലൂടെയായിരിക്കും. മനപ്പൂര്‍വ്വം വ്യക്തിപരമായി വേദനിപ്പിക്കാനായി പറയുന്ന കമന്റുകള്‍ എനിക്ക് തിരിച്ചറിയാനാവും.
തെറ്റുകളെക്കുറിച്ച്
സ്തുതിപാഠകരൊന്നും എനിക്കൊപ്പമില്ല. എന്റെ തെറ്റുകള്‍ ചൂണ്ടിക്കാണിച്ച് തരുന്നവരെ എനിക്ക് മുന്നിലുള്ളൂ. സ്വയം ഇപ്രൂവ് ചെയ്ത് മുന്നേറുന്ന വ്യക്തിയാണ് ഞാന്‍. സോഷ്യല്‍മീഡിയയിലെ കമന്റുകള്‍ തുടക്കത്തിലൊക്കെ എന്നെ ബാധിക്കുമായിരുന്നു. പ്രത്യേകതരം മാനസികാവസ്ഥയിലാണ് അങ്ങനെയുള്ള കമന്റുകള്‍ വരുന്നതെന്ന് പിന്നീടാണ് മനസിലാക്കിയത്. അതോടെ അതെന്നെ ബാധിക്കാതെയായി.
നെഗറ്റീവാക്കും
ആരെന്ത് പറഞ്ഞാലും അതില്‍ നെഗറ്റീവ് കലര്‍ത്തുന്ന പരിപാടിയാണ് ഇപ്പോഴത്തേത്. മതമോ രാഷ്ട്രീയമോ ഒക്കെ കലര്‍ത്തി നമ്മളറിയാത്ത വിധത്തില്‍ അതിനെ വളച്ചൊടിക്കുന്ന പ്രവണതയാണ് ഇപ്പോഴത്തേത്. നേരത്തെയൊക്കെ പല കാര്യങ്ങളിലും അഭിപ്രായം പറയാറുണ്ടായിരുന്നു. അങ്ങനെ ചെയ്യാതിരിക്കുന്നതാണ് നല്ലതെന്ന് പിന്നീട് മനസിലാക്കി. അതോടെയാണ് ആവശ്യമുള്ള സ്ഥലത്ത് മാത്രം സംസാരിച്ചാല്‍ മതിയെന്ന നിലപാട് എടുത്തത്.
വിമര്‍ശിക്കാറുണ്ട്
പോസിറ്റീവായ വിമര്‍ശനങ്ങളെ എപ്പോഴും സ്വാഗതം ചെയ്യാറുണ്ട്. അമ്മയും ചേട്ടനും ചേച്ചിയുമൊക്കെ സിനിമയിലെ കാര്യങ്ങളെക്കുറിച്ച് പറഞ്ഞ് വിമര്‍ശിക്കാറുണ്ട്. ഉള്ളത് ഉള്ളത് പോലെ പറയുന്നവരാണ് അവരെല്ലാം. തുടക്കത്തില്‍ കഥ കേള്‍ക്കാന്‍ അച്ഛനും അമ്മയുമൊക്കെ കൂടെയുണ്ടാവാറുണ്ടായിരുന്നു. പിന്നീടാണ് സ്വയം തീരുമാനമെടുക്കാന്‍ തുടങ്ങിയതെന്നും മഞ്ജു വ്യക്തമാക്കിയിരുന്നു.