എന്റെ വിജയങ്ങളില്‍ ഒരു വനിത സന്തോഷിക്കുന്നുണ്ടെങ്കില്‍ അതെന്റെ കേയയാണ്! അവള്‍ സിനിമയില്‍ വരരുതെന്നാണ് ആഗ്രഹം! അവളെപ്പോലൊരാള്‍ക്ക് പറ്റിയ ഫീല്‍ഡല്ല! മകളെക്കുറിച്ച് പ്രതാപ് പോത്തന്‍ പറഞ്ഞത്

സിനിമാപാരമ്പര്യമുണ്ടെങ്കിലും സംഗീതത്തോടാണ് താല്‍പര്യമെന്നായിരുന്നു പ്രതാപ് പോത്തന്റെ മകളായ കേയ പറഞ്ഞത്. സംഗീതമാണ് അവളുടെ ലോകം. എന്റെ ആത്മാവാണ് അവള്‍. എന്നെ പൂര്‍ണമായും മനസിലാക്കിയത് അവള്‍ മാത്രമാണ്. ഞങ്ങള്‍ നല്ല സുഹൃത്തുക്കളാണ്. അപ്പവും വീഞ്ഞും എന്ന ചിത്രത്തില്‍ ഗായികയായി കേയ എത്തിയിരുന്നു. ചിത്രത്തില്‍ പ്രധാന വേഷത്തില്‍ പ്രതാപ് പോത്തന്‍ എത്തിയിരുന്നു. അപ്പന്റെ അഭിനയവും മോളുടെ പാട്ടും ചേര്‍ന്നപ്പോള്‍ അത് മികച്ച അനുഭവമായിരുന്നുവെന്നും അദ്ദേഹം അന്ന് പറഞ്ഞിരുന്നു.

ആരാവണമെന്നുള്ളത് മകളുടെ തീരുമാനമാണ്. അവള്‍ സിനിമയില്‍ വരുന്നതിനോട് എനിക്ക് താല്‍പര്യമില്ല. അവളെപ്പോലൊരു പാവം പെണ്‍കുട്ടിക്ക് പറ്റിയ മേഖലയല്ല സിനിമ. വിശ്വാസവഞ്ചനയും പാരവെപ്പുകളുമൊക്കെയുള്ള ലോകമാണ് സിനിമ. മക്കള്‍ ബിസിനസിലോ രാഷ്ട്രീയത്തിലോ സിനിമയിലോ വരുന്നത് എന്റെ അച്ഛന് ഇഷ്ടമുണ്ടായിരുന്നില്ല. ഞങ്ങള്‍ മൂന്ന് ആണ്‍മക്കളും സിനിമയിലെത്തി എന്ന് മാത്രമല്ല അവര്‍ ബിസിനസും ചെയ്തിരുന്നു.

നല്ല ദാമ്പത്യം ഒരു ഭാഗ്യമാണ്. അങ്ങനെയൊരു ഭാഗ്യം തനിക്കുണ്ടായിട്ടില്ലെന്നും പ്രതാപ് പോത്തന്‍ പറഞ്ഞിരുന്നു. വീണ്ടും ഒരു കാതല്‍ കഥെ എന്ന ചിത്രത്തില്‍ നായികയായി അഭിനയിച്ച രാധികയെയാണ് പ്രതാപ് പോത്തന്‍ വിവാഹം ചെയ്തത്. ഒന്നര വര്‍ഷമേ ആ ബന്ധം നീണ്ടുപോയിരുന്നുള്ളൂ. വിവാഹസമയത്ത് 24 വയസേയുണ്ടായിരുന്നുളളൂ. രാധികയ്ക്ക് 17 വയസായിരുന്നു പ്രായം. പക്വതയില്ലായ്മ കൊണ്ടാണെന്ന് തോന്നുന്നു ആ ബന്ധം നിലനിന്നില്ല. രണ്ടാമത് വിവാഹിതനായെങ്കിലും അതും ശരിയായിരുന്നില്ല.

വിവാഹമെന്നത് വെറുമൊരു അഡ്ജസ്റ്റ്‌മെന്റാണ്. അതിലൊരു സ്‌നേഹവും പ്രണയമൊന്നുമില്ല. ഒറ്റയ്ക്ക് താമസിക്കുന്നതിന്റെ സുഖം ശരിക്കും അനുഭവിക്കുന്നുണ്ട്. ഫേസ്ബുക്കില്‍ ഒരുപാട് സൗഹൃദങ്ങളുണ്ട്. അതില്‍ ആണുങ്ങളും പെണ്ണുങ്ങളുമൊക്കെയുണ്ട്. അവരോട് ചാറ്റ് ചെയ്യുന്നത് പോലും നന്നായി ആസ്വദിക്കാന്‍ പറ്റുന്നുണ്ട്. കിടപ്പിലാവുന്ന സമയത്ത് നോക്കാന്‍ വല്ല ഹോംനഴ്‌സിനെ വെക്കുമെന്നുമായിരുന്നു അന്ന് പ്രതാപ് പോത്തന്‍ പറഞ്ഞത്.