നീതിക്ക് വേണ്ടി ഏതറ്റം വരെയും പോകും: നടിയുടെ സഹോദരൻ

കൊച്ചി: കൊച്ചിയിൽ നടി ആക്രമിക്കപ്പെട്ട സംഭവത്തിലെ കേസിൽ നിന്ന് യാതൊരു കാരണവശാലും ഒഴിഞ്ഞുമാറില്ലെന്നും നീതി ലഭിക്കാനായി ഏതറ്റം വരെയും പോകുമെന്നും നടിയുടെ സഹോദരൻ. രാജേഷ് ബി മേനോന്‍റെ ഫേസ്ബുക്കിലാണ് ഇത് വിശദമാക്കി കുറിപ്പ് എഴുതിയിരിക്കുന്നത്. പിന്മാറാനായിരുന്നു എങ്കിൽ ഒരിക്കലും മുന്നിലേക്ക് വരുമായിരുന്നില്ലെന്നും അദ്ദേഹം ചൂണ്ടിക്കാട്ടുന്നു. നിങ്ങളെല്ലാവരും കൂടെയുള്ളപ്പോൾ ഞങ്ങളൊറ്റയ്ക്കല്ലല്ലോ എന്നും അദ്ദേഹം കുറിച്ചിരിക്കുന്നു.




കഴിഞ്ഞദിവസവും രാജേഷ് ഫേസ്ബുക്കിൽ കൂടി വിഷയം ചില മാധ്യമങ്ങൾ കൈകാര്യം ചെയ്യുന്നതിനെ വിമര്‍ശിച്ചുകൊണ്ട് കുറിച്ചിരുന്നു. നടിയെ അപകീര്‍ത്തിപ്പെടുത്തും വിധമുള്ള വാര്‍ത്തകളെ വിമര്‍ശിച്ചായിരുന്നു ആ പ്രതികരണം. കൂടാതെ ഇതുമായി ബന്ധപ്പെട്ട വാര്‍ത്തകളിൽ 'ഇര' എന്നുപയോഗിക്കുന്നത് വല്ലാതെ വേദനിപ്പിക്കുന്നതായും രാജേഷ് ഇന്നലെ പറഞ്ഞിരുന്നു. പല സുഹൃത്തുക്കളുടെയും ചോദ്യത്തിന് മറുപടിയുമായാണ് ഇന്ന് രാജേഷ് ഫേസ്ബുക്കിൽ കുറിച്ചിരിക്കുന്നത്.

രാജേഷിന്‍റെ ഫേസ്‍‍ബുക്ക് കുറിപ്പിന്‍റെ പൂര്‍ണ രൂപം കാണാം

പല സുഹൃത്തുക്കളും ഇപ്പോഴും ചോദിക്കുന്നു ... കേസിൽ നിന്നും ഒഴിഞ്ഞു മാറുമോ എന്ന് ... ഞാൻ ആവർത്തിച്ചു പറയുകയാണ് ... പിന്മാറാനായിരുന്നു എങ്കിൽ ഒരിക്കലും മുന്നിലേക്ക് വരുമായിരുന്നില്ല ... നീതിയ്ക്കു വേണ്ടി ഏതറ്റം വരേയും പോകാൻ തയ്യാറാണ് ...എന്‍റെ സഹോദരിക്ക് സംഭവിച്ച ദുരന്തം ഇനിയൊരു ചലച്ചിത്ര താരത്തിനും സംഭവിച്ചുകൂടാ എന്ന ചിന്തക്കപ്പുറത്ത് , ഒരു സെലിബ്രിറ്റിക്കിങ്ങിനെ സംഭവിച്ചാൽ ഈ സമൂഹത്തിലെ സാധാരണക്കാരായ സ്ത്രീകൾക്ക് എന്തെല്ലാം സംഭവിച്ചു കൂടാ എന്നും , അങ്ങിനെ അനിഷ്ട സംഭവങ്ങളെന്തെങ്കിലും സംഭവിച്ചാൽ തന്നെ പ്രതികരിക്കാനുള്ള ആർജ്ജവം സ്ത്രീകൾ കാണിക്കേണ്ടതുണ്ട് എന്നുള്ളതു കൊണ്ടുമാണ് ഈ കേസിൽ നിന്നും ഞങ്ങൾ പിന്മാറില്ലെന്ന് ഉറപ്പിച്ചു പറയുന്നത് .







Will go forward with this Case: Actress's Brother

Actress's Brother Rajesh B Menon explained that Will go forward with this Case.