വീഡിയോയിലൂടെ വിവാഹാഭ്യർത്ഥന നടത്തി ആര്യ

ഒരു സിനിമാ നടനെ സംബന്ധിച്ചിടത്തോളം പെണ്ണു കിട്ടാൻ ഒരു പ്രയാസവുമില്ല. സൂപ്പർ താരമായി വിലസുന്ന ഒരാളാകുമ്പോൾ പിന്നെ ക്യൂ നിൽക്കാനും ആളുകളുണ്ടാകും. പൊതുവെ താരങ്ങളെല്ലാം വിവാഹക്കാര്യങ്ങളെല്ലാം ഉറപ്പിച്ചതിന് ശേഷമാണ് പുറത്ത് പറയാറ്, എന്നാൽ വിവാഹക്കാര്യത്തിൽ വ്യത്യസ്തമായ നിലപാട് സ്വീകരിച്ചിരിക്കുകയാണ് തമിഴ് സൂപ്പർതാരം ആര്യ. തനിക്ക് യോജിച്ച ജീവിതസഖിയെ തേടി ആര്യ സാമൂഹ്യ മാധ്യമങ്ങളിൽ പോസ്റ്റ് ചെയ്ത വീഡിയോ ഇപ്പോൾ വൈറലായി കൊണ്ടിരിക്കുകയാണ്.

ഭാവി വധു സിനിമലോകത്ത് നിന്ന് തന്നെയായിരക്കണമെന്ന ഒരു നിർബന്ധവുമില്ല ആര്യയ്ക്ക്. പ്രത്യേകിച്ച് ഒരു കണ്ടീഷനുമില്ല, ഒരെയൊരു ഡിമാന്‍റ് മാത്രമെയുള്ളൂ, തന്നെ ജീവിത പങ്കാളിയാക്കാൻ ആഗ്രഹിക്കുന്ന ഒരാൾ ആയിരിക്കണമെന്ന് മാത്രം. മാട്രിമോണിയയിൽ രജിസ്റ്റർ ചെയ്യാനും, വീട്ടുക്കാരും കുടുംബക്കാരും പോയി പെണ്ണു കണ്ട് വിവാഹം ഉറപ്പിക്കുന്നതിൽ ആര്യയ്ക്ക് തല്ക്കാലം താല്പര്യമില്ല. താനിത് ആരെയും പറ്റിക്കാൻ ചെയ്യുന്നതല്ല. ഇതൊരു പ്രാങ്ക് വീഡിയോയും അല്ല, ഇത് എന്‍റെ ജീവിതമാണ് എന്നാണ് താരം പറയുന്നത്.




ജീവിത സഖിയായി വരാൻ താല്പര്യമുള്ളർക്ക് എന്നെ ഈ ഫോൺ നമ്പറിൽ വിളിക്കാമെന്ന് പറഞ്ഞ് ഫോൺ നമ്പർ സഹിതമാണ് താരം പോസ്റ്റ് ചെയ്തിരിക്കുന്നത്. നിങ്ങളുടെ വിളിക്കായി താൻ കാത്തിരിക്കുന്നു എന്നാണ് ആര്യ വീഡിയോയിലൂടെ പറഞ്ഞത്. താരം അറിയാതെയാണ് ഈ വീഡിയോ ലീക്കായതെങ്കിലും, അതിൽ പറഞ്ഞതെല്ലാം ശരിയാണെന്ന് വ്യക്തമാക്കിയിരിക്കുകയാണ് ആര്യ. സുഹൃത്തുക്കൾ ഒപ്പിച്ച ഒരു പണിയായിരുന്നുവത്. എന്നാൽ താനൊരു ജീവിതസഖിയെ തേടുന്നു എന്നത് സത്യമാണ്.



ഇഷ്ടമായെങ്കിൽ വീഡിയോയിൽ നൽകിയിരിക്കുന്ന നമ്പറിൽ ബന്ധപ്പെടാനാണ് താരം ആവശ്യപ്പെട്ടിരിക്കുന്നത്. വീഡിയോയിൽ കാണുന്ന നമ്പറിൽ വിളിക്കുമ്പോൾ ഫോണിലേക്ക് www.mapillaiarya.com എന്ന വെബ്സൈറ്റ് വിലാസം ലഭിക്കും. അതിൽ പേരും വിലാസവും രേഖപ്പെടുത്തിയാൽ മാത്രം മതി. ജാതി, മതം, ജാതകം തുടങ്ങിയ കാര്യങ്ങളൊന്നും ആവശ്യപ്പെടുന്നില്ല എന്നതാണ് ശ്രദ്ധേയം.