'നിവീ, ഏറ്റവും മികച്ചതിൽ കൂടുതലൊന്നും നീ അ‍ര്‍ഹിക്കുന്നില്ല': തൃഷ

നിവിൻ പോളി നായകനായെത്തുന്ന തമിഴ് ചിത്രം 'റിച്ചി' റിലീസിനൊരുങ്ങുകയാണ്. ചിത്രത്തിന്‍റെ പുത്തൻ പോസ്റ്ററുകളും ഗാനവുമെല്ലാം പുറത്തെത്തവേ താരത്തിന് ആശംസകളുടെ പെരുമഴയാണ് കിട്ടിക്കൊണ്ടിരിക്കുന്നത്. ഇതോടനുബന്ധിച്ച് തെന്നിന്ത്യൻ നായിക തൃഷ നിവിനോട് പറഞ്ഞ വാക്കുകളാണ് ഇപ്പോൾ വൈറലാകുന്നത്. നിവിന്‍റെ ഏറ്റവും പുതിയ ചിത്രമായ 'ഹേയ് ജൂഡി'ൽ നായികയായെത്തുന്നത് തൃഷയാണ്.

നിവിന്‍റെ തമിഴിലെ ആദ്യ ചിത്രത്തിന് താരത്തിന് ആശംസകൾ നേര്‍ന്നതിനൊപ്പം തൃഷ ഫേസ്ബുക്കിൽ കുറിച്ച വാക്കുകളാണ് ശ്രദ്ധേയം. 'നിവി, നീ ഏറ്റവും മികച്ചതിൽ കൂടുതലൊന്നും അ‍ര്‍ഹിക്കുന്നില്ല'. അത്ര മികച്ച അഭിനേതാവാണ് നിവിൻ പോളി എന്നാണ് തൃഷ ഇതിലൂടെ പറഞ്ഞുവെക്കുന്നത്.

നിവിൻ പോളി മാസ് ഗെറ്റപ്പിലെത്തുന്ന റിച്ചി സംവിധാനം ചെയ്യുന്നത് ഗൗതം രാമചന്ദ്രനാണ്. പക്കാ മാസ് എന്‍റർടെയ്നറായി ഒരുക്കിയിരിക്കുന്ന ചിത്രത്തിന്‍റെ കഥ എഴുതിയിരിക്കുന്നത് രക്ഷിത് ഷെട്ടിയാണ്. 2014ൽ പുറത്തിറങ്ങിയ സൂപ്പര്‍ഹിറ്റ് കന്നഡ ചിത്രം 'ഉള്ളിടവരു കണ്ടാന്തെ'യുടെ തമിഴ് പതിപ്പാണ് റിച്ചി. നിവിനൊപ്പം തമിഴ്താരം നാട്ടിയും ചിത്രത്തിലെ പ്രധാന കഥാപാത്രത്തെ അവതരിപ്പിക്കുന്നു. ഇവരുടെ സൗഹൃദ ജീവിതത്തിൽ ഉണ്ടാകുന്ന അപ്രതീക്ഷിത സംഭവമാണ് ചിത്രത്തിന്‍റെ പ്രമേയം. ലോക്കൽ റൗഡിയായി നിവിനും കൂടാതെ നാട്ടി ബോട്ട് മെക്കാനിക്കായും എത്തുന്നു.

പ്രകാശ് രാജും ചിത്രത്തിലെ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. നിവിൻ അവതരിപ്പിക്കുന്ന കഥാപാത്രത്തിന്‍റെ വളർത്തച്ഛനായ ഒരു വൈദികന്‍റെ വേഷമാണ് പ്രകാശ് രാജ് അവതരിപ്പിക്കുന്നത്. ശ്രദ്ധ ശ്രീനാഥാണ് ചിത്രത്തിലെ നായിക. ലക്ഷ്മി പ്രിയ ചന്ദ്രമൗലി എന്നിവരാണ് ചിത്രത്തിലെ മറ്റുതാരങ്ങൾ.