ആദ്യം ഷോക്കായെങ്കിലും ഞാന്‍ പ്രതികരിച്ചു! പ്രമോഷനിടയിലെ മോശം അനുഭവത്തെക്കുറിച്ച് യുവനടിയുടെ കുറിപ്പ്‌

ആള്‍ക്കൂട്ടത്തിനിടയില്‍ നിന്നും മോശം പെരുമാറ്റം നേരിടേണ്ടി വന്നതിനെക്കുറിച്ച് പറഞ്ഞുള്ള താരങ്ങളുടെ കുറിപ്പുകള്‍ ചര്‍ച്ചയായി മാറിയിരിക്കുകയാണ്. സാറ്റര്‍ഡേ നൈറ്റ്‌സ് എന്ന ചിത്രത്തിന്റെ പ്രമോഷനിടയിലായിരുന്നു സംഭവം. കോഴിക്കോട് ഹൈലൈറ്റ് മാളില്‍ വെച്ചായിരുന്നു താരങ്ങള്‍ക്ക് ദുരനുഭവമുണ്ടായത്. സിനിമയുടെ പ്രമോഷന്‍ നല്ല രീതിയില്‍ നടന്നുവരികയായിരുന്നു. കോഴിക്കോട് എത്തിയപ്പോഴും നല്ല സ്വീകരണമായിരുന്നു ലഭിച്ചത്. ജനക്കൂട്ടത്തെ നിയന്ത്രിക്കാന്‍ അധികൃതര്‍ ബുദ്ധിമുട്ടുകയായിരുന്നു. പരിപാടി കഴിഞ്ഞ് പുറത്തേക്ക് വരുന്നതിനിടയിലാണ് കൂടെയുണ്ടായിരുന്ന നടിയോട് ഒരാള്‍ മോശമായി പെരുമാറിയത്.
ആളെ തിരിച്ചറിയാനോ, പ്രതികരിക്കാനോ ഉള്ള സമയം പോലും അവര്‍ക്ക് കിട്ടിയിരുന്നില്ല. അത്രയും തിരക്കായിരുന്നു അവിടെ. അതിന് ശേഷമാണ് ഒരാള്‍ എന്നോടും മോശമായി പെരുമാറിയത്. ആദ്യം ഷോക്കായെങ്കിലും അപ്പോള്‍ത്തന്നെ ഞാന്‍ പ്രതികരിച്ചു. ഇങ്ങനെയുള്ള ദുരനുഭവങ്ങള്‍ ആര്‍ക്കുമുണ്ടാവാതിരിക്കട്ടെയെന്ന് ഞാന്‍ ആഗ്രഹിക്കുന്നുവെന്നുമായിരുന്നു യുവനടി കുറിച്ചത്. നിരവധി പേരായിരുന്നു നടിയുടെ പോസ്റ്റിന് താഴെയായി പിന്തുണ അറിയിച്ചെത്തിയത്.
സാറ്റര്‍ഡേ നൈറ്റ് സിനിമയുടെ പ്രമോഷന്റെ ചിത്രങ്ങളും വീഡിയോയും സോഷ്യല്‍മീഡിയയിലൂടെ വൈറലായിരുന്നു. സിനിമാപ്രവര്‍ത്തകരും പ്രേക്ഷകരുമെല്ലാം ഇതേക്കുറിച്ച് പ്രതികരിച്ചെത്തിയിരുന്നു. കോഴിക്കോട് ഏറെയിഷ്ടപ്പെടുന്ന സ്ഥലമായിരുന്നു. പരിപാടി കഴിഞ്ഞ് പോവുന്നതിനിടയിലാണ് ഒരാള്‍ തന്നെ കയറിപ്പിടിച്ചതെന്നും ആ ഷോക്കില്‍ തനിക്ക് പ്രതികരിക്കാനായില്ലെന്നുമായിരുന്നു കൂടെയുണ്ടായിരുന്ന നടി കുറിച്ചത്.
സാറ്റർഡൈ നൈറ്റ്സ് എന്ന സിനിമയുടെ ടീം കാലിക്കറ്റ് മാളിൽ വച്ച് നേരിട്ട അവസ്‌ഥ പോസ്റ്റിലൂടെയും വീഡിയോയിലൂടെയും കാണുമ്പോൾ അതൊരാൾക്ക് മാത്രം ഉണ്ടായ അനുഭവമല്ല , ആ കൂട്ടത്തിലുള്ള മറ്റ്‌ സ്ത്രീകൾക്കും ഇതേ അബ്യൂസ് ഉണ്ടായെന്നു മനസ്സിലാവുന്നു . ഇവിടെ ഒരു സ്ത്രീ അത് ഭാര്യയാണെങ്കിലും ആരാണെങ്കിലും നോ പറഞ്ഞാൽ അത് നോ തന്നെ എന്ന തരത്തിലുള്ള ഒരാളുടെ കൺസെന്റ്, പ്രൈവസി, തുടങ്ങിയ കാര്യങ്ങളെ അഡ്രസ് ചെയ്തു ചുറ്റുമുള്ള ആയിരം തെറ്റുകളെ പുറത്തേക്ക് കൊണ്ട് വരുന്ന സമയത്താണ് ഈ കേറിപ്പിടിക്കൽ പോലുള്ള ബേസിക് ക്രൈം ചുറ്റിലുമുള്ള നൂറു കാമറകൾക്ക് മുമ്പിൽ അരങ്ങേറുന്നത്. നടിമാർ പൊതു സ്വത്താണ് , പിന്നെ കിട്ടുന്നത് അടിയായാലും , തൊഴിയായാലും അപ്പോഴത്തെ സുഖം മുഖ്യം എന്ന പോലുള്ള സൂക്തങ്ങളുമായി ഇപ്പോഴും ജാമ്പവാന്റെ കാലത്തെ കടച്ചിലുമായി നടക്കുന്ന ഇവറ്റയെ ഒക്കെ കൃത്യമായി കാമറ വഴി പൊക്കി ഇമ്മീഡിയറ്റ് വിധി അടിച്ചു വായിൽ കൊടുക്കണം , ഫേസും പബ്ലിക് ആക്കണമെന്നായിരുന്നു സംവിധായകനായ ബിലഹരി കുറിച്ചത്.
Latest Malayalam Movie News