'മാനസ മൈന'യിലൂടെ മലയാളികളുടെ ഹൃദയം കീഴടക്കിയ സലിൽ ദായുടെ ഓർമ്മകൾക്ക് 25 വയസ്സ്

'ചെമ്മീനി'ലെ മാനസമൈനേ വരൂ, കടലിനക്കരെ പോണൊരേ, പെണ്ണാളേ പെണ്ണാളേ എന്നീ പാട്ടുകള്‍, 'നെല്ലി'ലെ കദളി ചെങ്കദളി, 'മദനോത്സവ'ത്തിലെ മാടപ്രാവേ വാ, സന്ധ്യേ കണ്ണീരിതെന്തേ സന്ധ്യേ, സാഗരമേ ശാന്തമാക നീ, 'ഏതോ ഒരു സ്വപ്ന'ത്തിലെ പൂമാനം പൂത്തുലഞ്ഞേ തുടങ്ങി ഒരുപിടി ഗാനങ്ങള്‍ മലയാളത്തിന് സമ്മാനിച്ച അതുല്യ സംഗീത സംവിധായകനാണ് സലിൽ ചൗധരി. സലിൽ ചൗധരി ഓർമ്മയായിട്ട് ഇന്ന് 25 വര്‍ഷം പൂര്‍ത്തിയാവുകയാണ്. വർഷങ്ങൾ എത്രയൊക്കെ കഴിഞ്ഞാലും മാസ്മരികമായ അദ്ദേഹത്തിന്‍റെ ഈണങ്ങള്‍ ഇന്നും നമ്മോടൊപ്പമുണ്ട്. മലയാളികള്‍ ഏറെ സ്നേഹത്തോടെ ‘സലിൽദാ’ എന്ന് വിളിക്കുന്ന അദ്ദേഹത്തിന്‍റെ ഓര്‍മ്മകളിലൂടെ.

Also Read: സിനിമയിൽ ഇടം കിട്ടാതിരുന്ന പാട്ടുകൾ ഇവിടെ കേൾക്കാം; യൂട്യൂബ് ചാനലുമായി 'ജാതിക്കാതോട്ട'ത്തിന്‍റെ ഈണക്കാരൻ

1925 നവംബർ 19ന് ബംഗാളിലെ സൊനാർപൂർ ഗ്രാമത്തിൽ ആണ് ജനനം. 1949 ൽ ‘പരിബർത്തൻ’ എന്ന സത്യൻ ബോസ് ചിത്രത്തിന് സംഗീതം നൽകിയായിരുന്നു സിനിമയിൽ സലിൽ ദാ എത്തിയത്. കവി, നാടകകൃത്ത്, കഥാകൃത്ത് എന്നീ നിലകളിലെല്ലാം തിളങ്ങിയ ശേഷമാണ് അദ്ദേഹം സംഗീത സംവിധാനത്തിലേക്ക് എത്തിയത്.

1949-ൽ ബംഗാളി സിനിമകളിൽ സംഗീതം നൽകി സിനിമാ ലോകത്തേക്കെത്തിയ അദ്ദേഹം 1953-ൽ ആണ് ബോളിവുഡിൽ എത്തുന്നത്. ഒ അമർ സജനി, മേനേ തേരേ ലിയേ, നാ ജിയോ നാ, കഹീ ദൂർ ജബ് ദീൻ ദയാൽ ജായേ, സുഹാനാ സഫർ ഓർ യേ മോസം തുടങ്ങി നിരവധി ശ്രദ്ധേയ ഗാനങ്ങള്‍ ബോളിവുഡ് സിനിമാ ലോകത്തിന് സമ്മാനിച്ച അദ്ദേഹം 1965-ൽ ചെമ്മീൻ എന്ന സിനിമയിലൂടെയാണ് മലയാള സിനിമാ ലോകത്തേക്ക് എത്തിയത്.

Also Read: 'ഒരു ദിവസം ഫഹദിന്റെ കോള്‍ വന്നു'; സി യു സൂണ്‍ ചിത്രീകരിച്ചത് ഇങ്ങനെ, റോഷന്‍ മാത്യു പറയുന്നു

ശേഷം ഏഴുരാത്രികള്‍, അഭയം, സ്വപ്നം, നെല്ല്, രാസലീല, പ്രതീക്ഷ, നീല പൊന്മാൻ, രാഗം, തോമാശ്ലീഹാ, തുലാവര്‍ഷം, പുതിയ വെളിച്ചം, ദേവദാസി, ദ്വീപ്, വിഷുക്കണി, ഈ ഗാനം മറക്കുമോ, മദനോത്സവം, ഏതോ ഒരു സ്വപ്നം, ചുവന്ന ചിറകുകള്‍, എയര്‍ ഹോസ്റ്റസ്, വെള്ളം, തുമ്പോളി കടപ്പുറം തുടങ്ങി നിരവധി സിനിമകളുടെ ഭാഗമായിട്ടുണ്ട്. 27 മലയാള ചിത്രങ്ങളിൽ നൂറിലധികം ഗാനങ്ങൾക്ക് അദ്ദേഹം സംഗീതം ഒരുക്കിയിട്ടുണ്ട്. 1995 സെപ്റ്റംബർ അഞ്ചിനാണ് അദ്ദേഹം അന്തരിച്ചത്.

Also Watch :