''ആലായാൽത്തറ വേണം', ഈ വരികൾക്ക് നൂറ്റാണ്ടുകളുടെ പഴക്കം, ഇത്‌ അച്ഛൻ എഴുതിയതല്ല, കണ്ടെത്തുകയായിരുന്നു'; മറുപടിയുമായി കാവാലം ശ്രീകുമാർ!

ആലായാല്‍ തറ വേണം എന്ന ഗാനത്തിൻ്റെ പൊളിച്ചെഴുത്ത് കഴിഞ്ഞ ദിവസങ്ങളിൽ സോഷ്യൽ മീഡിയയിൽ ഏറെ ചർച്ചയായി മാറിയിരുന്നു. ഗായകൻ സൂരജ് സന്തോഷാണ് പൊളിച്ചെഴുതിയ ഗാനത്തിന് പിന്നിൽ. പുതിയ ഗാനത്തിന്റെ വരികള്‍ തയ്യാറാക്കിയത് സൂരജ് സന്തോഷും ശ്രുതി നമ്പൂതിരിയും ചേർന്നായിരുന്നു. സൂരജ് തന്നെയാണ് സംഗീതം നല്‍കി ഗാനം പാടിയത്. ഇപ്പോഴിതാ ഈ വിഷയത്തിൽ വിശദീകരണവുമായി രംഗത്തെത്തിയിരിക്കുകയാണ് നാടകകൃത്തും കവിയുമായ കാവാലം നാരായണപ്പണിക്കരുടെ മകൻ ഗായകൻ കാവാലം ശ്രീകുമാർ.

Also Read: പേളിയുടെ ബോളിവുഡ് അരങ്ങേറ്റം; ആകാംഷ പകര്‍ന്ന് 'ലുഡോ'

സൂരജ് സന്തോഷിന്റെ മ്യൂസിക് വീഡിയോയ്ക്ക് എതിരെ കാവാലം ശ്രീകുമാർ തൻ്റെ പ്രതിഷേധം രേഖപ്പെടുത്തിയത് ഫേസ്ബുക്ക് വീഡിയോയിലൂടെയാണ്. ഗാനം ആലപിക്കുന്ന വീഡിയോ പങ്കുവെച്ചുകൊണ്ടാണ് കാവാലം ശ്രീകുമാറിൻ്റെ പ്രതിഷേധം. വീഡിയോ പങ്കുവെച്ചുകൊണ്ട് അദ്ദേഹം കുറിച്ചത് ഇങ്ങനെയാണ്. "ആലായാൽത്തറ വേണം". അങ്ങനെ തന്നെയാണാ പാട്ട്‌. അത്‌ 100 വർഷത്തിലേറെ പഴക്കമുള്ള ഒരു നാടൻ ശീലാണ്‌.' ആലായാൽത്തറ വേണം എന്ന ഹാഷ് ടാഗിനൊപ്പമാണ് ഫേസ്ബുക്കിലൂടെയുളള ശ്രീകുമാർ പ്രതികരണം രേഖപ്പെടുത്തിയത്.

Also Read: നിങ്ങൾക്കു എന്താണ് പ്രശ്നം; വന്നു പാട്ടും പാടി കാശും വാങ്ങി പോകും!

'ഇത്‌ അഛൻ എഴുതിയതല്ലാ. അഛൻ കണ്ടെത്തി....നെടുമുടി വേണുച്ചേട്ടനും ഞങ്ങളുമൊക്കെ പാടിപ്പാടി നടക്കുന്ന ഒരു പാട്ട്‌.
പിന്നെ കറുകറക്കാർമ്മുകിൽ അഛന്റെ മുദ്ര പതിഞ്ഞ ഒരു മഴപ്പാട്ടാണ്‌. അവസാനം പാടിയ മണ്ണ്‌ എന്ന കവിതയിലെ വരികളും അഛന്റെയാണ്‌. എന്നും നമ്മുടെ നാടൻ ശീലുകൾ മണ്ണും മണ്ണിൽ അദ്ധ്വാനിക്കുന്നവരുടെയും ആണ്‌. ഈ വരികൾ തിരുത്തേണ്ട ആവശ്യമുണ്ടോ? പുതിയ ആശയങ്ങളും അതിലൂടെ പുതിയ ഈണങ്ങളുമല്ലേ നമുക്ക്‌ അഭികാമ്യം. #alayaltharavenam #ആലായാൽ'.

Also Read: ജിയോ ബേബിയുടെ പുതിയ സിനിമ വരുന്നു; സുരാജും നിമിഷയും പ്രധാന വേഷത്തിൽ

പുതിയ കാലത്തിൻ്റെ പ്രത്യക്ഷ രാഷ്ട്രീയ ബോധം ഉൾപ്പെടുത്തിയാണ് സൂരജ് ഈ ഗാനം പൊളിച്ചെഴുതി അവതരിപ്പിച്ചത്. കഴിഞ്ഞ ദിവസം സോഷ്യൽ മീഡിയയിലൂടെ റിലീസ് ചെയ്ത മ്യൂസിക് വീഡിയോ നിരവധി പേരാണ് ഏറ്റെടുത്തിരിക്കുന്നത്.