'ഒരേ തൂവല്‍ പക്ഷി'; 'സ്റ്റാന്‍ഡ് അപ്പ്' തീം സോംഗ് പുറത്തിറങ്ങി

നിമിഷ സജയനും രജിഷ വിജയനും പ്രധാന കഥാപാത്രങ്ങളായെത്തി വിധു വിന്‍സന്‍റ് സംവിധാനം ചെയ്യുന്ന ‘സ്റ്റാന്‍ഡ് അപ്പി’ന്‍റെ തീം സോംഗ് പുറത്തിറങ്ങി. ‘ഒരേ തൂവല്‍ പക്ഷി’ എന്നാരംഭിക്കുന്നതാണ് ഗാനം. മലയാളം വരികള്‍ എഴുതിയിരിക്കുന്നത് ബിലു പദ്മിനി നാരായണനും സംഗീതം പകര്‍ന്നതും ഇംഗ്ലീഷ് വരികള്‍ എഴുതിയിരിക്കുന്നതും വര്‍ക്കിയുമാണ്.

ഫിലിം ഫെസ്റ്റിവല്‍ സര്‍ക്യൂട്ടുകളില്‍ പ്രേക്ഷകപ്രീതി നേടിയിട്ടുള്ള ചിത്രം സ്ലീപ്‌ലെസ്‌ലി യുവേഴ്‌സ് എന്ന സിനിമയ്ക്കായും ഇദ്ദേഹം സംഗീതസംവിധാനം നിര്‍വ്വഹിച്ചിട്ടുണ്ട്. നിരവധി പരസ്യചിത്രങ്ങള്‍ക്കും സംഗീതം ഒരുക്കിയിട്ടുള്ള വര്‍ക്കി ഇപ്പോള്‍ ഗായിക സയനോരയോടൊപ്പം ‘ഡിന്‍ ചിക് നേഷന്‍’ എന്ന ബാന്‍ഡ് ഒരുക്കിയിട്ടുമുണ്ട്.
സയനോരയും സഹോദരി ശ്രുതി ഫിലിപ്പും വര്‍ക്കിയും ചേര്‍ന്നാണ് ഗാനം പാടിയിരിക്കുന്നത്. മൂന്ന് പാട്ടുകളാണ് ‘സ്റ്റാന്‍ഡ് അപ്പി’ല്‍ സയനോര പാടിയിട്ടുള്ളത്. ‘പ്രണയത്തിലൊരു ആത്മകഥ’ എന്ന കവിതാസമാഹാരത്തിലൂടെ ശ്രദ്ധേയയായിട്ടുള്ളയാളാണ് ഈ ഗാനത്തിന്‍റെ വരികളെഴുതിയിട്ടുള്ള ബിലു പദ്മിനി നാരായണന്‍.