'കനവിന്‍ അഴകേ കാവല്‍ മിഴിയേ'; ക്രിസ്തീയ ഭക്തിഗാനവുമായി വിദ്യാസാഗര്‍

ശ്രദ്ധേയ തെന്നിന്ത്യന്‍ സംഗീത സംവിധായകന്‍ വിദ്യാസാഗര്‍ ആദ്യമായി ഒരുക്കിയ ക്രിസ്തീയ ഭക്തിഗാനം നെഞ്ചിലേറ്റി ആരാധകര്‍. "കനവിന്‍ അഴകേ കാവല്‍ മിഴിയേ" എന്നു തുടങ്ങുന്ന ഈ ഗാനം യൂട്യൂബിൽ തരംഗമായിരിക്കുകയാണ്. വര്‍ഷങ്ങള്‍ നീണ്ട ഇടവേളയ്ക്ക് ശേഷമാണ് മലയാളികളുടെ പ്രിയ സംഗീത സംവിധായകന്‍ വിദ്യാസാഗര്‍ മലയാളത്തിൽ വീണ്ടും സജീവമാകുന്നത്. സിനിമയിലല്ലാതെ വിദ്യാസാഗര്‍ ഒരുക്കിയ ഗാനമെന്ന പ്രത്യേകത കൂടി ഈ പാട്ടിനുണ്ട്.

Also Read: ഇത് ഫര്‍ഹാന്‍റേയും റേച്ചലിന്‍റേയും പ്രണയം; മനസ്സുതൊട്ട് 'ഹിതം'

വിവിധ ഇന്ത്യന്‍ ഭാഷാ സിനിമകളില്‍ സൂപ്പര്‍ഹിറ്റ് ഗാനങ്ങള്‍ ഒരുക്കിയ വിദ്യാസാഗര്‍ ആദ്യമായാണ് ഒരു ക്രിസ്തീയ ഭക്തിഗാനത്തിന് സംഗീതം ഒരുക്കുന്നത്. പുതുതലമുറയില്‍ ശ്രദ്ധേയയായ യുവഗായിക സെലിന്‍ ഷോജിയാണ് ഈ ഗാനം ആലപിച്ചിരിക്കുന്നത്. ഒട്ടേറെ ക്രിസ്തീയ ഭക്തിഗാനങ്ങള്‍ രചിച്ച് സംഗീത ആസ്വാദകരുടെ പ്രശംസ പിടിച്ചുപറ്റിയ ജോയ്സ് തോന്നിയാമലയാണ് ഈ ഗാനം രചിച്ചിരിക്കുന്നത്.

ഗാനം റിലീസ് ചെയ്ത് മണിക്കൂറുകള്‍ക്കുള്ളില്‍ യൂട്യൂബില്‍ തരംഗമായിരിക്കുകയാണ്. സമീപകാലത്ത് ഇറങ്ങിയ ക്രിസ്തീയ ഭക്തിഗാനങ്ങളില്‍ നിന്ന് ഏറെ പുതുമയുള്ളതാണ് ഈ ഗാനമെന്നാണ് സംഗീതാസ്വാദകരുടെ പക്ഷം. മെലഡിയുടെ രാജകുമാരനായ വിദ്യാസാഗറില്‍ നിന്ന് പിറവിയെടുത്ത ഈ ആത്മീയഗാനം ഏറെ ശ്രദ്ധ നേടി മുന്നേറുകയാണ്.

Also Read: അര്‍ജുനും അലസാഡ്രയും ഒന്നിച്ച 'കളിയന്നെ' മ്യൂസിക്ക് വീഡിയോ

ബാനര്‍ പി ഒ പി മീഡിയ, ഗാനരചന ജോയ്സ് തോന്നിയാമല, സംഗീതം വിദ്യാസാഗര്‍, ആലാപനം സെലിന്‍ ഷോജി (ഫിമെയില്‍ വേര്‍ഷന്‍), കാര്‍ത്തിക് (മെയില്‍ വേര്‍ഷന്‍), ക്യാമറ ഷോജി സെബാസ്റ്റ്യന്‍, ഫ്ലൂട്ട് നിഖില്‍, തബല ഓജസ് ആദിയ, വിഷ്ണു ശ്യാം, ഗണേഷ്, ബെന്‍ കാച്ചപ്പിള്ളി, അപര്‍ണ്ണ, ദീപ്തി, വീണ, ഹരിപ്രിയ, ശെബകരാജ്, നാരായണന്‍, ശശിഹരന്‍, സുദര്‍ശന്‍, വര്‍ഷ വല്ലകി, ആദിത്യ ശ്രീനിവാസന്‍ തുടങ്ങിയവരാണ് " കനവിന്‍ അഴകേ കാവല്‍ മിഴിയേ" എന്ന ഹിറ്റ് ഗാനത്തിന്‍റെ അണിയറ പ്രവര്‍ത്തകരായുള്ളത്.