'ബിയോണ്ട് ദി ബോര്‍ഡേര്‍സ്' റിലീസ് നാല് ഭാഷകളില്‍

കൊച്ചി: മോഹൻലാലിനെ നായകനാക്കി മേജര്‍ രവി ഒരുക്കുന്ന പുതിയ ചിത്രമായ 1971, ബിയോണ്ട് ബോര്‍ഡേര്‍സ് റിലീസിനെത്തുക നാല് ഭാഷകളിലായി. മലയാളത്തിന് പുറമെ തെലുങ്ക്, ഹിന്ദി, തമിഴ് ഭാഷകളിലും ചിത്രം പുറത്തിറക്കും. മലയാളവും തെലുങ്കും ഒരേസമയം റിലീസ് ചെയ്യും. ഹിന്ദിയില്‍ പ്രമുഖ ബാനറാണ് സിനിമയുടെ റിലീസ് അവകാശം സ്വന്തമാക്കിയിട്ടുള്ളത്. മറ്റുഭാഷകളിലും മോഹന്‍ലാലിന്‍റെ താരമൂല്യം കൂടിയതോടെയാണ് അണിയറക്കാര്‍ ഇത്തരത്തിലൊരു റിലീസിന് മുതിര്‍ന്നത്.

ഇന്ത്യ-പാക് യുദ്ധ സമയത്ത് രാജസ്ഥാന്‍ മേഖലയില്‍ നടന്ന സംഭവമാണ് ചിത്രത്തില്‍ പറയുക. രണ്ട് ഉയര്‍ന്ന പട്ടാള ഉദ്യോഗസ്ഥരുടെ ജീവിതവും അവരുടെ ബന്ധവുമൊക്കെ ചിത്രത്തില്‍ പ്രതിപാദിക്കുന്നുണ്ട്. മേജര്‍ മഹാദേവനായും പിതാവ് കേണല്‍ സഹദേവനായുമാണ് മോഹന്‍ലാല്‍ അഭിനയിക്കുന്നത്. തെലുങ്ക് താരം അല്ലു സിരിഷ്, അരുണോദയ് സിംഗ്, പ്രിയങ്കാ ചൗധരി, സമുദ്രക്കനി, രണ്‍ജി പണിക്കര്‍, സുധീര്‍ കരമന, സൈജു കുറുപ്പ് എന്നിവരും ചിത്രത്തിലുണ്ട്. സുജിത് വാസുദേവാണ് ക്യാമറ. രാഹുല്‍ സുബ്രഹ്മണ്യം, ഗോപി സുന്ദര്‍ എന്നിവരാണ് സംഗീത സംവിധാനം. ഏപ്രില്‍ ഏഴിന് ചിത്രം തീയറ്ററുകളിലെത്തും.



'1971: Beyond the Borders' will be release in four languages

Mohanlal's Beyond the Borders will be release in four languages on 7th February. Major Ravi is directing this Movie.