മോഹൻലാലിന്‍റെ 'ഇരുവര്‍' ഇറങ്ങിയിട്ട് 21 വര്‍ഷം

മോഹൻലാലിന്‍റെ ഏറ്റവും മികച്ച അഭിനയമുഹൂർത്തങ്ങൾ, പ്രകാശ്‌ രാജിന്‍റെ ലോകോത്തര അഭിനയം, ഐശ്വര്യ റായിയുടെ തന്മയത്തമാർന്ന പ്രകടനം, എ.ആര്‍ റഹ്മാന്റെ ഇമ്പമാർന്ന പാട്ടുകളും മണി രത്നത്തിന്റെ സംവിധാന മികവും,സന്തോഷ് ശിവന്‍റെ ക്യാമറയും എല്ലാം കൊണ്ടും ഇരുവര്‍ എന്ന ചിത്രം ഒരു വിസ്മയമായിരുന്നു. 1997 ജനുവരി 14നായിരുന്നു ചിത്രമിറങ്ങിയത്. ചിത്രം ബോക്സോഫീസ് പരാജയമായിരുന്നെങ്കിലും 21-ാം വർഷത്തിലും നിരവധിപേർ ഇരുവറിന്‍റെ ആരാധകരാണ്.

തമിഴ് രാഷ്ട്രീയനേതാക്കളായിരുന്ന എം.ജി രാമചന്ദ്രന്റെയും (എം.ജി.ആർ), എം. കരുണാനിധിയുടേയും രാഷ്ട്രീയജീവിതത്തിന്റെ അംശങ്ങൾ പകർത്തിയതായിരുന്നു ചിത്രം. മോഹൻ ലാൽ, പ്രകാശ് രാജ് എന്നിവർ പ്രധാന വേഷങ്ങളിലെത്തിയ ഈ ചിത്രത്തിലൂടെയാണ് ലോകസുന്ദരി ഐശ്വര്യ റായ് ബച്ചൻ ആദ്യമായി വെള്ളിത്തിരയിലെത്തിയത്. ഇവരെക്കൂടാതെ രേവതി, ഗൗതമി, നാസ്സർ, തബു എന്നിവരും ഈ ചിത്രത്തിൽ പ്രധാന വേഷങ്ങളിൽ അണിനിരന്നു.

ഇന്ത്യയ്ക്കകത്തും പുറത്തുമായി ധാരാളം വേദികളിൽ പ്രദർശിപ്പിക്കപ്പെടുകയും, പുരസ്കാരങ്ങൾ നേടുകയും ചെയ്തു. തമിഴിൽ കൂടാതെ മലയാളം, തെലുങ്ക് എന്നീ ഭാഷകളിലും ഈ ചിത്രം പ്രദർശനത്തിനെത്തി. പ്രകാശ് രാജിന് മികച്ച സഹനടനുള്ള ദേശീയ ചലച്ചിത്ര അവാർഡും സന്തോഷ് ശിവന് മികച്ച ചായാഗ്രാഹകനുള്ള ദേശീയ ചലച്ചിത്ര അവാർ‍ഡും ഈ ചിത്രത്തിലൂടെ ലഭിക്കുകയുണ്ടായി.

എം ജി ആറിനെ അനുസ്മരിപ്പിക്കുന്ന ആനന്ദന്‍ എന്ന കഥാപാത്രമായാണ് മോഹന്‍ലാല്‍ അഭിനയിച്ചത്. ആ ചിത്രത്തില്‍ കരുണാനിധിയെ അനുസ്മരിപ്പിക്കുന്ന തമിഴ് ശെല്‍‌വന്‍ എന്ന കഥാപാത്രത്തിനായി മണിരത്നം ആദ്യം സമീപിച്ചത് സാക്ഷാല്‍ മമ്മൂട്ടിയെ ആയിരുന്നു. പിന്നീട് അത് പ്രകാശ് രാജിനെ നിശ്ചയിക്കുകയുമായിരുന്നു.