'സന്ദേശം' റിലീസ് ചെയ്തിട്ട് നാളെ കാൽനൂറ്റാണ്ട്...

മലയാളത്തിലെ എക്കാലത്തേയും മികച്ച രാഷ്ട്രീയ സിനിമകളിലൊന്നായ ''സന്ദേശം'' റിലീസ് ചെയ്തിട്ട് നാളെ 25 വ‍ർഷം പൂർത്തിയാകുന്നു. 1991 ഒക്ടോബർ 30ന് ആയിരുന്നു ശ്രീനിവാസൻ എഴുതി സത്യൻ അന്തിക്കാട് സംവിധാനം ചെയ്ത ചിത്രം പുറത്തിറങ്ങിയത്. കാൽ നൂറ്റാണ്ട് പിന്നിട്ടിട്ടും ചിരിയും ചിന്തയും ഉണർത്തുന്നു എന്നുള്ളത് തന്നെയാണ് സിനിമയെ എല്ലാ കാലത്തെയും സന്ദേശമാക്കുന്നത്. പുതിയകാലത്ത് ട്രോളുകൾ സൃഷ്ടിക്കാൻ ഏറെപേർ എടുക്കുന്നതും സന്ദേശം സിനിമയിലെ സംഭാഷണങ്ങളാണെന്നത് സിനിമയെ കാലാതിവർത്തിയാക്കുന്നു.



ആദ്യം സ്വയം നന്നാകണം, പിന്നെ കുടുംബം പിന്നെ നാട്. രാഷ്ട്രീയം തലക്ക് പിടിച്ച മക്കളായ കോട്ടപ്പള്ളി പ്രകാശനും പ്രഭാകരനും, അച്ഛൻ രാഘവൻ നായർ നൽകുന്ന സന്ദേശം. സിനിമ വരച്ചിട്ട രാഷ്ട്രീയ സാമൂഹ്യ ചുറ്റുപാടിന് കാൽ നൂറ്റാണ്ടിനപ്പുറവും കാര്യമായ മാറ്റങ്ങളില്ല. അതുകൊണ്ട് തന്നെ സിനിമയും സിനിമയുടെ സന്ദേശവും ഇന്നും പ്രസക്തമാണ്. ട്രോളായും കോമഡി ക്ലിപ്പുകളായും രാഷ്ട്രീയ ആക്ഷേപഹാസ്യ പരിപാടികളിലെ എക്കാലത്തെയും മികച്ച ഡയലോഗുകളായും സന്ദേശം എന്നും മലയാളിക്ക് മുന്നിലേക്കെത്തുന്നു.



ശ്രീനിവാസൻ സത്യൻ അന്തിക്കാട് ടീമിന്റെ എക്കാലത്തെയും മികച്ച ഹിറ്റാണ് സന്ദേശം. ശ്രീനിവാസനും ജയറാമും തിലകനും ശങ്കരാടിയും സിദ്ധിഖും ഇന്നസെന്റും മാമുക്കോയയും ഒടുവിൽ ഉണ്ണികൃഷ്ണനുമെല്ലാം അനശ്വരമാക്കിയ കഥാപാത്രങ്ങൾ. സിനിമ പറഞ്ഞതിനെക്കാൾ രാഷ്ട്രീയത്തിലെ കള്ളക്കളികളും അഴിമതികളും പെരുകുമ്പോഴാണ് കാൽ നൂറ്റാണ്ടിലേക്കെത്തുന്ന സന്ദേശത്തിന്റെ പ്രസക്തി. സന്ദേശത്തിന്റെ രണ്ടാം ഭാഗത്തെ കുറിച്ച് ചോദിക്കുമ്പോഴൊക്കെ രാഷ്ട്രീയക്കാ‍ർ മാറിയാലല്ലേ സന്ദേശം മാറ്റേണ്ടതുള്ളു? എന്ന് ശ്രീനിവാസനും സത്യൻ അന്തികാടും എപ്പോഴും പറയുന്നത് ഈ സിനിമയെപ്പോലെ ഈ സിനിമ മാത്രം എന്നതിന് തെളിവാണ്.

It has been 25 years since the release of Malayalam movie Sandesam.