ഗോവ രാജ്യാന്തര ചലച്ചിത്രമേളയ്ക്ക് ഇന്ന് തിരി തെളിയും

പനാജി: 49-ാമത് ഗോവ രാജ്യാന്തര ചലച്ചിത്രമേളയ്ക്ക് ഇന്ന് തിരി തെളിയും. 68 രാജ്യങ്ങളില്‍ നിന്നുള്ള 212 ചിത്രങ്ങളാണ് മേളയില്‍ ഇത്തവണ പ്രദര്‍ശിപ്പിക്കുക. വൈകീട്ട് നാലര മണിക്ക് ശ്യാമപ്രസാദ് മുഖര്‍ജി ഇന്‍ഡോര്‍ സ്റ്റേഡിയത്തില്‍ ഉദ്ഘാടന ചടങ്ങുകൾ നടക്കും. നവംബര്‍ 28നാണ് മേളയുടെ സമാപനം. ജൂലിയന്‍ ലാന്‍ഡെയ്സിൻ്റെ പ്രഥമ സംവിധാന സംരംഭമായ 'ദ ആസ്‌പേണ്‍ പേപ്പേഴ്സ് എന്ന ചിത്രം ഉദ്ഘാടന ചിത്രമായി പ്രദ‍ർശിപ്പിക്കും. ജര്‍മന്‍ ചിത്രമായ സീല്‍ഡ് ലിപ്സാണ് സമാപന ചിത്രം.

ഇൻ്റർനാഷണൽ മത്സര കാറ്റഗറിയിലേക്ക് തെരെഞ്ഞെടുക്കപ്പെട്ട ഇന്ത്യൻ സിനിമകളിൽ രണ്ട് മലയാള ചിത്രങ്ങളുണ്ട്. ജയരാജിന്റെ 'ഭയാനകം', ലിജോ ജോസ് പെല്ലിശ്ശേരിയുടെ 'ഈ.മ.യൗ' എന്നിവയാണ് പ്രദർശിപ്പിക്കുക. ടൂ ലെറ്റ്' എന്ന തമിഴ് ചിത്രം മത്സര വിഭാഗത്തിലുണ്ട്. ലോക സിനിമയിലെ പെരുന്തച്ചൻ ഇങ്ഗ്മര്‍ ബര്‍ഗ്മാൻ്റെ നൂറാം ജന്മദിനാഘോഷവും ഗോവയിൽ നടത്തും. ബര്‍ഗ്മാൻ്റെ മികച്ച ഏഴു ചിത്രങ്ങള്‍ പ്രദര്‍ശിപ്പിക്കും.

ഗോവന്‍ ഗവര്‍ണര്‍ മൃദുല സിന്‍ഹ, വാര്‍ത്താവിതരണ വകുപ്പ് സഹമന്ത്രി കേണല്‍ രാജ്യവര്‍ദ്ധന്‍ റാത്തോര്‍, പൊതുമരാമത്തുവകുപ്പു മന്ത്രി സുധിന്‍ മാധവ് ധവാലികര്‍, ഫിലിം സര്‍ട്ടിഫിക്കറ്റ് അപ്പീല്‍ ട്രൂബ്യൂണലിൻ്റെ ചെയര്‍മാനായ പ്രസൂണ്‍ ജോഷി ജൂലിയന്‍ ലാന്‍ഡെയ്സ്, ഗായകന്‍ അരിജിത് സിംഗ്, സംവിധായകരായ രമേഷ് സിപ്പി, മധുര്‍ ഭണ്ഡാര്‍ക്കര്‍, സിങ്കപൂര്‍ അമേരിക്കന്‍ നടന്‍ ചിന്‍ ഹാന്‍ എന്നിവ‍ർ ഉദ്ഘാടന ചടങ്ങില്‍ പങ്കെടുക്കും