നിങ്ങളല്ലെങ്കിൽ പിന്നെയാരാണ്! ബിജു മേനോനും നഞ്ചിയമ്മയും സൂര്യയും തിളങ്ങിയ ദിവസം! ദേശീയ പുരസ്‌കാര ജേതാക്കള്‍ക്ക് ആശംസയുമായി ആരാധകലോകം

ബിജു മേനോന്‍, അപര്‍ണ ബാലമുരളി, സൂര്യ തുടങ്ങിയവരെല്ലാം ദേശീയ അവാര്‍ഡ് സാധ്യത പട്ടികയിലുണ്ടെന്നുള്ള വിവരങ്ങള്‍ കഴിഞ്ഞ ദിവസം പുറത്തുവന്നിരുന്നു. ഇത്തവണത്തെ ജേതാക്കളെ പ്രഖ്യാപിക്കുമ്പോള്‍ എല്ലാവരും ഉറ്റുനോക്കിയതും ഇവരുടെ കാര്യം ്അറിയാനായിരുന്നു. മലയാളക്കരയെ സംബന്ധിച്ച് ഒത്തിരി സന്തോഷമുള്ള പ്രഖ്യാപനമായിരുന്നു കഴിഞ്ഞുപോയത്. സൂരറൈ പോട്ര് എന്ന ചിത്രത്തിലൂടെയായി മികച്ച നടനുള്ള പുരസ്‌കാരം സൂര്യയും നടിക്കുള്ള അവാര്‍ഡ് അപര്‍ണ ബാലമുരളിയും സ്വന്തമാക്കുകയായിരുന്നു.
സച്ചി സംവിധാനം ചെയ്ത അയ്യപ്പനും കോശിയിലൂടെയായാണ് ബിജു മേനോനും നഞ്ചിയമ്മയും അവാര്‍ഡ് സ്വന്തമാക്കിയത്. നഞ്ചിയമ്മയെന്ന ഗായികയെ സിനിമാലോകത്തിന് പരിചയപ്പെടുത്തിയത് സച്ചിയായിരുന്നു. തന്റെ കഥാപാത്രങ്ങളും തനിക്ക് പ്രിയപ്പെട്ടവരുമെല്ലാം പുരസ്‌കാരം സ്വന്തമാക്കിയപ്പോള്‍ അത് കാണാനോ, മികച്ച സംവിധായകനുള്ള പുരസ്‌കാരം ഏറ്റുവാങ്ങാനോ സച്ചി ഇല്ലാത്തതിന്റെ സങ്കടത്തിലാണ് എല്ലാവരും. അയ്യപ്പനും കോശിയെക്കുറിച്ചും സച്ചിയെക്കുറിച്ചുമെല്ലാം പറഞ്ഞ് താരങ്ങളെല്ലാം എത്തിയിരുന്നു. അപ്രതീക്ഷിതമായുള്ള ആ വിടവാങ്ങല്‍ സൃഷ്ടിച്ച ശൂന്യത ഇപ്പോഴും അതേപോലെ തുടരുകയാണ്. സച്ചി ഏത് സ്‌ക്രിപ്റ്റ് കൊണ്ടുവന്നാലും അഭിനയിക്കാന്‍ റെഡിയാണെന്ന് പറഞ്ഞ് നില്‍ക്കുന്നയാളാണ് ഞാനെന്നായിരുന്നു മുന്‍പ് പൃഥ്വിരാജ് പറഞ്ഞത്.
മികച്ച സഹനടനുള്ള ദേശീയ പുരസ്‌കാരം താന്‍ നേടിയപ്പോള്‍ അത് കാണാന്‍ സച്ചിയില്ലെന്നുള്ള വേദനയുണ്ടെന്നായിരുന്നു ബിജു മേനോന്‍ പ്രതികരിച്ചത്. മികച്ച സംഘട്ടന സംവിധാനത്തിനുള്ള പുരസ്‌കാര ജേതാവിനെ തിരഞ്ഞെടുത്തതും അയ്യപ്പനും കോശിയിലൂടെയായിരുന്നു. ഒന്നിലധികം നേട്ടങ്ങളുമായി തന്റെ സിനിമ ദേശീയ തലത്തില്‍ ശ്രദ്ധിക്കപ്പെടുമ്പോള്‍ അത് കാണാന്‍ സച്ചിയില്ലല്ലോയെന്നാണ് സിനിമാപ്രേമികളും വേദനയോടെ പറയുന്നത്.