യുവത്വതിളപ്പിൽ ആനന്ദം ഇറങ്ങുന്നു; ഈ മാസം 21ന്

വിനീത് ശ്രീനിവാസന്‍റെ സംവിധാന സഹായി ഗണേഷ് രാജ് സംവിധാനം ചെയ്യുന്ന പുതിയ സിനിമ 'ആനന്ദം' ഒക്ടോബ‍‍ര്‍ 21ന് തിയറ്ററിലെത്തും. സിനിമയില്‍ വിശാഖ് നായര്‍, അനു ആന്‍റണി, തോമസ് മാത്യു, അരുണ്‍ കുര്യന്‍, സിദ്ധി മഹാജന്‍, റോഷന്‍ മാത്യു, അനാര്‍ക്കലി മരിക്കാര്‍ എന്നിവരാണ് അരങ്ങേറുന്നത്.

സംവിധാനത്തിനൊപ്പം തിരക്കഥയും ഗണേഷ് രാജ് ആണ്. ഹാബിറ്റ് ഓഫ് ലൈഫ് എന്ന ബാനറില്‍ വിനീത് ശ്രീനിവാസനും കാസ്റ്റ് ആന്‍ഡ് ക്രൂവിന് വേണ്ടി വിനോദ് ഷൊര്‍ണ്ണൂരും ചേര്‍ന്നാണ് നിര്‍മ്മാണം നിര്‍വ്വഹിക്കുന്നത്. ക്യാമറ ആനന്ദ് സി ചന്ദ്രന്‍. അഭിനവ് സുന്ദര്‍ നായക് എഡിറ്റിംഗും ഗായകന്‍ സച്ചിന്‍ വാര്യര്‍ സംഗീതസംവിധാനവും നിര്‍വഹിക്കുന്നു.

വിനീത് ശ്രീനിവാസന്‍, അനു എലിസബത്ത് ജോസ്, മനു മഞ്ജിത് എന്നിവരാണ് ഗാനരചന. തട്ടത്തിന്‍ മറയത്ത്, തിര, ജേക്കബിന്‍റെ സ്വര്‍ഗരാജ്യം എന്നീ സിനിമകളില്‍ വിനീതിന്‍റെയും ബാംഗ്ലൂര്‍ ഡേയ്സ് എന്ന ചിത്രത്തില്‍ അഞ്ജലി മേനോന്‍റെയും സഹസംവിധായകനായിരുന്നു ഗണേഷ് രാജ്. ലാല്‍ ജോസിന്‍റെ എല്‍ ജെ ഫിലിംസാണ് വിതരണം.