അഭിജിത്തിന്‍റെ പാട്ടിന് ടൊറന്‍റോ ഏഷ്യൻ ഫിലിം പുരസ്കാരം

യേശുദാസിന്റെ ശബ്ദത്തോട് സാമ്യമെന്നപേരില്‍ മാത്രം കഴിഞ്ഞ വര്‍ഷത്തെ സംസ്ഥാന അവാര്‍ഡ് നഷ്ടപ്പെട്ട അഭിജിത്തിനെ തേടിയെത്തിയത് രാജ്യാന്തര പുരസ്‌കാരം. ടൊറന്റോ ഇന്‍ര്‍നാഷണല്‍ സൗത്ത് ഏഷ്യന്‍ ഫിലിം അവാര്‍ഡ് 2018ല്‍ മികച്ച ഗായകനുള്ള പുരസ്‌കാരമാണ് അഭിജിത്ത് നേടിയത്. ജയറാമിന്റെ ആകാശമിഠായി എന്ന ചിത്രത്തിലെ പാട്ടിനാണ് അഭിജിത്തിന് പുരസ്‌കാരം ലഭിച്ചിരിക്കുന്നത്. അവാര്‍ഡ് വാര്‍ത്ത നടന്‍ ജയറാം അദ്ദേഹത്തിന്റെ ഫേസ്ബുക്ക് പേജിലൂടെ ലോകത്തെ അറിയിച്ചിരിക്കുകയാണ്. ആകാശപ്പാല കൊമ്പത്ത് എന്നുതുടങ്ങുന്ന ഗാനമാണ് അവാർഡിനർഹമായത്.

ജനകീയ വോട്ടെടുപ്പിലൂടെയാണ് വിജയിയെ തെരഞ്ഞെടുത്തതെന്നും പറഞ്ഞറിയിക്കാൻ കഴിയാത്രത്ത സന്തോഷമാണ് ഇപ്പോഴുള്ളതെന്നും ഫേസ്ബുക്ക് വീഡിയോയിൽ അഭിജിത്ത് പറയുന്നു. അവാര്‍ഡ് നേടാന്‍ കാരണം ജയറാമേട്ടനാണെന്നും അദ്ദേഹമാണ് തന്നെ പാട്ട് പാടാന്‍ ക്ഷണിച്ചതെന്നും അഭിജിത്ത് പറഞ്ഞു. തനിക്ക് വോട്ട് നല്‍കിയ ജനങ്ങള്‍ക്കും ആകാശമിഠായിലെ എല്ലാ അണിയറക്കാര്‍ക്കും അഭിജിത്ത് നന്ദിയറിയിച്ചിട്ടുമുണ്ട്.