അബിയുടെ മകന്‍ 'കിസ്മത്തി'ൽ നായകൻ

നടനും പ്രമുഖ മിമിക്രി താരവുമായ അബിയുടെ മകൻ ഷെയ്ൻ നിഗം സിനിമയിൽ അരങ്ങേറ്റം കുറിക്കുന്നു. പൊന്നാനി നഗരസഭ കൗണ്‍സിലർ കൂടിയായ ഷാനവാസ്‌ ബാവക്കുട്ടി സംവിധാനം ചെയ്യുന്ന 'കിസ്‌മത്‌' എന്ന സിനിമയിലൂടെയാണ്‌ അബിയുടെ മകന്‍ ഷെയ്‌ന്‍ നിഗം നായകനായെത്തുന്നത്‌. ചിത്രം ഉടൻ തിയറ്ററുകളിലെത്താനിരിക്കുകയാണ്.




സീരിയലുകളിലൂടെയും മറ്റും അഭിനയലോകത്തേക്കെത്തിയ ഷെയ്ൻ അന്നയും റസൂലും, കമ്മട്ടിപ്പാടം എന്നീ സിനിമകളിലും ശ്രദ്ധേയവേഷങ്ങൾ അഭിനയിച്ചിരുന്നു. കൂടാതെ നിരവധി ഷോർട്ട് ഫിലിമുകളുടേയും ഭാഗമായിട്ടുണ്ട്. സംവിധായകൻ രാജീവ് രവിയാണ് കിസ്മത്തിന്‍റെ നിർമ്മാണം. കൂടാതെ ലാൽ ജോസാണ് എൽജെ ഫിലിംസ് ബാനറിലൂടെ സിനിമ വിതരണത്തിനെത്തിക്കുന്നതും.




എറണാകുളം എളമക്കരയിൽ താമസിക്കുന്ന അബിയുടെ മൂന്നു മക്കളിൽ ആദ്യത്തെയാളാണ് ഷെയ്ൻ. എഞ്ചിനീയറിംഗ് പഠനശേഷമാണ് സിനിമയിൽ സജീവമാകുന്നത്. ശ്രുതി മേനോനാണ് കിസ്മത്തിലെ നായിക. പൊന്നാനിയുടെ ചരിത്രവും വര്‍ത്തമാനവും സംസ്കാരവും ഇഴചേര്‍ന്നൊരു സിനിമയാണ് കിസ്മത്ത്. അന്‍വര്‍ റഷീദ് സംവിധാനം ചെയ്ത ‘ബ്രിഡ്ജ്’ എന്ന സിനിമക്ക് കാമറ ചലിപ്പിച്ച സുരേഷ് രാജനാണ് സിനിമയുടെ ഛായാഗ്രാഹകന്‍.