അപ്പാനി ശരത് നായകനാകുന്ന മൂന്നാം ചിത്രം; സിനിമയുടെ ഫസ്റ്റ് ലുക്ക് ഉടന്‍

'അങ്കമാലി ഡയറീസി'ലെ അപ്പാനി രവി എന്ന കഥാപാത്രത്തിലൂടെ ശ്രദ്ധ നേടിയ നടൻ ശരത് കുമാര്‍ നായകനാകുന്ന പുതിയ ചിത്രത്തിന്‍റെ പ്രഖ്യാപനം ഉടൻ. നവാഗതരായ മണികണ്ഠന്‍ വിഷ്ണുലോകവും മഹേഷ് മധുവും ചേര്‍ന്നാണ് റൊമാന്‍റിക് ഡ്രാമയായൊരുങ്ങുന്ന ഈ ചിത്രം ഒരുക്കുന്നത്. സിനിമയുടെ പേരും താരങ്ങളുടെ വിവരങ്ങളും ഉടൻ പുറത്തുവിടുമെന്നാണ് സൂചന. ചിത്രത്തിന്‍റെ ഫസ്റ്റ് ലുക്ക് പോസ്റ്റര്‍ അടുത്ത ദിവസങ്ങളിൽ സോഷ്യൽമീഡിയയിലൂടെ പുറത്തുവിടും.

'കോണ്ടസ'യിലും 'ലവ് എഫ് എമ്മി'ലും നായകനായ ശേഷം അപ്പാനി ശരത് നായകനാകുന്ന ചിത്രം കൂടിയാണിത്. 'ലവ് എഫ് എം' ഉടൻ റിലീസിനായി ഒരുങ്ങുകയുമാണ്. അപ്പാനി ശരത് നായകനാകുന്ന മൂന്നാമത്തെ ചിത്രമാണിത്. ഇതുവരെ അപ്പാനി ചെയ്തതില്‍ നിന്ന് ഏറെ വ്യത്യസ്തമായ പ്രമേയമാണ് പുതിയ ചിത്രത്തിലേതെന്നാണ് സൂചന.

'അങ്കമാലി ഡയറീസി'ലെ അപ്പാനി രവി എന്ന വേഷത്തിന് ശേഷം അപ്പാനി ശരത് എന്നാണ് ശരത് കുമാര്‍ അറിയപ്പെടുന്നത് തന്നെ. വില്ലന്‍ വേഷത്തിലൂടെ സിനിമാ ലോകത്തെത്തിയ താരം ലാല്‍ജോസ് സംവിധാനം ചെയ്ത 'വെളിപാടിന്‍റെ പുസ്തകം', 'പോക്കിരി സൈമണ്‍', 'പൈപ്പിന്‍ ചുവട്ടിലെ പ്രണയം', 'സച്ചിൻ' തുടങ്ങിയ സിനിമകളിൽ അഭിനയിച്ചിട്ടുള്ള ശരത് മണിരത്‌നത്തിന്‍റെ 'ചെക്ക ചിവന്ത വാന'ത്തിലും വിശാൽ നായകനായ 'സണ്ടക്കോഴി-2' തുടങ്ങിയ തമിഴ് സിനിമകളിലും അഭിനയിച്ചിട്ടുണ്ട്.

തമിഴ്‌നാടിനെ ഒരുകാലത്ത് വിറപ്പിച്ച ഗുണ്ടാനേതാവായിരുന്ന ഗൗരി ശങ്കര്‍ എന്ന ഓട്ടോ ശങ്കറിന്‍റെ ജീവിതം വെബ് സീരീസായെത്തിയപ്പോള്‍ അപ്പാനി ശരതാണ് അതിൽ ഓട്ടോ ശങ്കറായി എത്തിയത്. ഈ സീരിസിലൂടെ അപ്പാനി തെന്നിന്ത്യൻ സിനിമാലോകത്ത് ഏറെ ശ്രദ്ധിക്കപ്പെട്ട താരമായിരിക്കുകയുമാണ്.

നടനും മിമിക്രി താരവുമായ സാജു കൊടിയന്‍ തിരക്കഥ എഴുതുന്ന പുതിയ ചിത്രമാണ് ശരത് നായകനായി ഉടൻ തീയേറ്ററുകളിലെത്തുന്ന 'ലവ് എഫ് എം'. ഇതിനുശേഷം അപ്പാനി നായകനാകുന്ന പുതിയ ചിത്രത്തിന്‍റെ ചിത്രീകരണം അടുത്ത വർഷം ജനുവരിയിലാണ് ആരംഭിക്കാനിരിക്കുന്നത്.