ദിലീപിന്‍റെ സഹോദരൻ സംവിധായകനാകുന്നു; ആദ്യ ചിത്രത്തിന്‍റെ പൂജ നടന്നു

നടൻ ദിലീപിന്‍റെ സഹോദരൻ അനൂപ് സംവിധായകനാകുന്ന ആദ്യ ചിത്രത്തിന്‍റെ പൂജ ഇന്ന് നടന്നു. ചിത്രം നിര്‍മ്മിക്കുന്നത് ദിലീപിന്‍റെ തന്നെ ഗ്രാൻഡ് പ്രൊഡക്ഷൻസാണ്. ഇടപ്പള്ളി അഞ്ചുമന ക്ഷേത്രത്തിൽ വെച്ചാണ് ചിത്രത്തിന്‍റെ പൂജ നടന്നത്. സിനിമാരംഗത്തെ നിരവധിപേര്‍ ചടങ്ങിന്‍റെ ഭാഗമായി.

ചിത്രങ്ങള്‍: അജിലാൽ (TOI)
പുതുമുഖങ്ങൾക്ക് ഏറെ അവസരമുള്ള ചിത്രമാണിതെന്നാണ് സൂചന. മാസങ്ങള്‍ക്ക് മുമ്പ് ഈ ചിത്രത്തിനായുള്ള കാസ്റ്റിംഗ് കോൾ ദിലീപിന്‍റെ ഔദ്യോഗിക ഫേസ്ബുക് പേജ് വഴി പുറത്തിറക്കിയിരുന്നു. എഴുത്തുകാരനും തിരക്കഥാകൃത്തുമായ സന്തോഷ് എച്ചിക്കാനമാണ് ചിത്രത്തിനായി തിരക്കകഥയൊരുക്കുന്നത്. അർജ്ജുൻ അശോകനാണ് ചിത്രത്തിൽ നായകനാകുന്നതെന്നാണ് സൂചന.
നിവിൻ പോളി, അജു വർഗീസ് ഉൾപ്പെടെയുള്ള നവാഗതർക്ക് സിനിമയിൽ അവസരം ഒരുക്കിയത് ദിലീപിന്‍റെ ഗ്രാൻഡ് പ്രൊഡക്ഷൻസ് നിർമ്മിച്ച മലർവാടി ആർട്സ് ക്ലബ് വഴിയായിരുന്നു. ഞാൻ സ്റ്റീവ് ലോപസ്, അന്നയും റസൂലും, ചന്ദ്രേട്ടൻ എവിടെയാ, നിദ്ര തുടങ്ങിയ ചിത്രങ്ങൾക്ക് ശേഷം സന്തോഷ് എച്ചിക്കാനം തിരക്കഥയൊരുക്കുന്ന ചിത്രമാണിത്.
ദിലീപിന്‍റെ മകള്‍ മീനാക്ഷിയാണ് പൂജ ചടങ്ങിൽ ഏറെ ശ്രദ്ധ നേടിയ താരം. നടന്മാരായ വിഷ്ണു ഉണ്ണികൃഷ്ണൻ, ബിബിൻ ജോര്‍ജ്ജ്, സംവിധായകരായ വൈശാഖ്, മാര്‍ത്താണ്ഡൻ, അജയ് വാസുദേവ്, തിരക്കഥാകൃത്ത് ഉദയ് കൃഷ്ണ, നിര്‍മ്മാതാവ് ആൽവിൻ ആന്‍റണി തുടങ്ങി നിരവധിപേര്‍ പൂജയുടെ ഭാഗമായെത്തിയിരുന്നു.