തലക്കോളമില്ലാത്ത ഫാൻസ് അസോസിയേഷനുകളെ നിയന്ത്രിക്കണം; ആകെയുള്ള പ്രതീക്ഷ ഫഹദില്‍ മാത്രമെന്ന് ഹരീഷ് പേരടി

നടന്‍മാരുടെ ഫാന്‍സ് അസോസിയേഷനുകളെ നിയമപരമായി നിയന്ത്രിക്കേണ്ട സമയം അതിക്രമിച്ചുവെന്ന് നടന്‍ ഹരീഷ് പേരടി. ബിഗ് ബോസ് റിയാലിറ്റി ഷോ മത്സരാര്‍ഥിയായ രജിത് കുമാറിന് കഴിഞ്ഞ ദിവസം കൊച്ചി വിമാനത്താവളത്തില്‍ അദ്ദേഹത്തിന്‍റെ ആരാധകര്‍ നല്‍കിയ സ്വീകരണം ചര്‍ച്ചയായിരുന്ന സാഹചര്യത്തിലാണ് ഹരീഷ് പ്രതികരവുമായി എത്തിയിരിക്കുന്നത്. കൊറോണ ഭീതിയില്‍ ശക്തമായ മുന്‍കരുതല്‍ സ്വീകരിച്ച് പ്രതിരോധ പ്രവര്‍ത്തനങ്ങള്‍ നടക്കുമ്പോഴാണ് കഴിഞ്ഞ ദിവസം വിമാനത്താവളത്തില്‍ ആരാധകരുടെ ആവേശപ്രകടനം നടന്നത്.

'മഹാനടന്‍മാര്‍ പുതിയ തീരുമാനങ്ങൾ എടുക്കേണ്ട സമയമായിരിക്കുന്നു. തലക്കോളമില്ലാത്ത ഫാൻസുകൾ എന്ന ആൾകൂട്ടത്തിന് അഴിഞ്ഞാടാൻ വിട്ടുകൊടുക്കരുത്. ഫാന്‍സ് അസോസിയേഷനുകള്‍ വേണ്ടെന്ന് ഉറക്കെ പ്രഖ്യാപിച്ച നടന്‍ ഫഹദ് ഫാസിലിലാണ് ഇനി പ്രതീക്ഷയെന്നും' അദ്ദേഹം ഫെയ്സ്ബുക്കില്‍ കുറിച്ചു.

Also Read: തൊടല്ലേ...! കൊറോണയെ നേരിടാന്‍ കുട്ടിക്കാലത്തേ പഠിച്ച താരറാണി, ചിത്രം ഏറ്റെടുത്ത് ആരാധകര്‍

ഹരീഷ് പേരടിയുടെ ഫെയ്സ്ബുക്ക് കുറിപ്പ് വായിക്കാം

ഏല്ലാ ഫാൻസുകാരെയും നിയമപരമായി നിയന്ത്രിക്കേണ്ട സമയം അതിക്രമിച്ചിരിക്കുന്നു..കഴിഞ്ഞ വർഷമാണ് സംസ്ഥാനത്തിന്റെ മുഖ്യമന്ത്രി പങ്കെടുത്ത ഒരു യോഗത്തിൽ ഒരു സൂപ്പർസ്റ്റാർ ഫാൻസ് മുഖ്യമന്ത്രിയെ സംസാരിക്കാൻ സമ്മതിക്കാത്ത രീതിയിൽ ബഹളമുണ്ടാക്കുകയും ആ പ്രമുഖ നടൻ ഇരിക്കുന്ന വേദിയിൽ വെച്ച് സംസ്ഥാനത്തിന്റെ മുഖ്യമന്ത്രി പ്രസംഗം മുഴുമിപ്പിക്കാതെ അവസാനിപ്പിച്ചതും...ഇതും ഈ സമയത്ത് ചർച്ചചെയ്യപെടേണ്ടതാണ് എന്ന് ഒരു ജനാധിപത്യ വിശ്വാസിയായ ഞാൻ രാഷ്ട്രീയ ഭേദമന്യേ വിശ്വസിക്കുന്നു...എത്രയോ മനുഷ്യർ അവരുടെ ജീവൻ കൊടുത്ത് ഉണ്ടാക്കിയെടുത്തതാണി ജനാധിപത്യ കേരളം...ആ കേരളത്തെ തലക്കോളമില്ലാത്ത ഫാൻസുകൾ എന്ന ആൾകൂട്ടത്തിന് അഴിഞ്ഞാടാൻ വിട്ടുകൊടുക്കരുത്...ഈ എയർപോർട്ട് സംഭവത്തോടെ ഇതിന് ഒരു അവസാനമുണ്ടാവണം..ഫാൻസ് അസോസിയേഷനുകളുള്ള ചെറുതും വലുതുമായ ഏല്ലാ നടൻമാർക്കും ഇത്ബാധകമാണ് ...മലയാളത്തിന്റെ അഭിമാനം ഉയർത്തിപിടിച്ച ഏല്ലാ മഹാനടൻ മാരുടെയും അഭിനയമികവിന് മുൻപിൽ ബഹുമാനത്തോടെ തല താഴ്ത്തി കൊണ്ട് പറയുന്നു...ഇത്തരം തലതിരിഞ്ഞ ആൾകൂട്ടത്തെ പോറ്റി വളർത്തരുത്..ആകെയുള്ള പ്രതീക്ഷയും ഉദാഹരണവും മലയാളികൾ ഹൃദയത്തിലേററിയ ഫഹദ് ഫാസിൽ എന്ന നടൻ മാത്രമാണ്...തനിക്ക് ഫാൻസ് അസോസിയേഷനുകൾ വേണ്ട എന്ന ഉറക്കെ പ്രഖ്യാപിച്ച ഒരേയൊരു ഫഹദ് ...പുതിയ കേരളം മഹാനടൻമാരുടെ പുതിയ തീരുമാനങ്ങൾക്കായാണ് കാത്തിരിക്കുന്നത് .