എന്‍റെ ചക്കിയാ, നിങ്ങളുടെ മാളവിക! ജയറാം-മാളവിക പുതിയ പരസ്യത്തിന് ട്രോളോടു ട്രോള്‍

'എന്‍റെ ചക്കിയാ, നിങ്ങളുടെ മാളവിക' എന്നുള്ള പരസ്യ വാചകം ഏറ്റെടുത്താണ് ട്രോളന്മാര്‍ വിലസിയത്. അതോടൊപ്പം ഈ പരസ്യം കാണുന്ന മകൻ കാളിദാസന്‍റെ അവസ്ഥയും ട്രോളന്മാര്‍ വിഷയമാക്കിയിട്ടുണ്ട്. ഏതായാലും ട്രോളുകളും പരസ്യം പോലെതന്നെ ഹിറ്റായി.

ട്രോളുകളെ പോസിറ്റീവായെടുത്ത് മാളവിക തന്നെ തന്‍റെ ഫേസ്ബുക്ക് സ്റ്റോറിയാക്കുകയുമുണ്ടായി. കാളിദാസിനേയും ജയറാമിനേയും ടാഗ് ചെയ്തുകൊണ്ടായിരുന്നു മാളവിക ഇത് പങ്കുവെച്ചത്. ഏതായാലും ട്രോളുകള്‍ താരങ്ങളേയും സന്തോഷിപ്പിച്ചിട്ടുണ്ടെന്ന് ഇതിൽ നിന്ന് മനസ്സിലാക്കാം.

പരസ്യം കണ്ട് ലോക് ഡൗണ്‍ തീരുന്നതിന്‍റെ പിറ്റേദിവസം ജയറാമിന്‍റെ വീട്ടിലേക്ക് ചിലർ എത്തുന്നതും ചക്കിയെ വിവാഹം കഴിക്കാന്‍ തങ്ങള്‍ തയ്യാറാണെന്ന് പറയുന്നതുമൊക്കെയാണ് ഒരു ട്രോള്‍. ചിലർ മാളവികയെ ജയറാം വിളിക്കുന്നതുപോലെ ചക്കി എന്ന് വിളിക്കുന്നതാണ് മറ്റൊരു ട്രോള്‍.

മാളവികയുടെ വിവാഹത്തെക്കുച്ച് അച്ഛൻ ചിന്തിക്കുന്നത് കാണുന്ന കാളിദാസിന്‍റെ ചിന്തകളെന്തായിരിക്കും എന്ന് കടന്ന് ചിന്തിച്ചുകൊണ്ടായിരുന്നു മറ്റ് ചില ട്രോളുകള്‍. എന്നെ തവിട് കൊടുത്ത് മേടിച്ചതാണോ അപ്പയെന്ന് നിരാശയോടെ കരയുന്ന എന്‍റെ വീട് അപ്പൂന്‍റേം സിനിമയിലെ കുട്ടി കാളിദാസിനെയാണ് ഈ ട്രോളിൽ കാണിച്ചിരുന്നത്.

ഇന്‍റർനാഷണൽ ചളു യൂണിയൻ, ട്രോള്‍ മലയാളം, ട്രോള്‍ കേരള തുടങ്ങിയ ട്രോള്‍ ഗ്രൂപ്പുകള്‍ വഴിയാണ് കൂടുതൽ ട്രോളുകളും ഷെയര്‍ ചെയ്തിരിക്കുന്നത്. കൂടാതെ യൂട്യൂബിൽ ട്രോള്‍ വീഡിയോകളും നിരവധി ഇറങ്ങിയിട്ടുമുണ്ട്.