'മാമാങ്കം' റിലീസിന് മുന്നേ ആ സസ്പെൻസ് പുറത്ത് വിട്ടു !

ബിഗ് ബജറ്റ് പിരീഡ് ചിത്രം മാമാങ്കത്തില്‍ സ്ത്രീ കഥാപാത്രമായും മമ്മൂട്ടി പ്രത്യക്ഷപ്പെടുന്നുണ്ടെന്ന് മുമ്പേ റിപ്പോര്‍ട്ടുകളുണ്ടായിരുന്നു. ട്രാന്‍സ് ജെന്‍ഡറായിട്ടായിരിക്കും അതെന്നും വാർത്തകളുണ്ടായിരുന്നു. ഇപ്പോഴിതാ വനിതാ മാഗസിന്‍റെ ഈ ആഴ്ചത്തെ പതിപ്പിന്‍റെ കവര്‍ ചിത്രമായി മമ്മൂട്ടിയുടെ സ്‌ത്രൈണ ഭാവത്തിലുള്ള ലുക്ക് പുറത്തുവിട്ടിരിക്കുകയാണ് അണിയറ പ്രവര്‍ത്തകര്‍.
മമ്മൂട്ടി തന്നെയാണ് ഇത് സോഷ്യൽമീഡിയയിലൂടെ പങ്കുവെച്ചിരിക്കുന്നത്. മാമാങ്കത്തിലെ വ്യത്യസ്ഥ വേഷങ്ങളിലൂടെ എന്നു കുറിച്ചുകൊണ്ട് മാമാങ്കം നിര്‍മ്മാതാവ് വേണു കുന്നപ്പിള്ളി വനിതാ മാഗസിന്‍ ചിത്രം പങ്കുവച്ചിട്ടുമുണ്ട്.

Also Read: 'മാമാങ്കം' റിലീസ് മാറ്റി; ചിത്രമെത്തുന്നത് ഡിസംബർ 12ന്

ചിത്രം നവംബർ ഇരുപത്തിയൊന്നിന് തീയേറ്ററുകളിൽ എത്തുമെന്നാണ് മുമ്പ് ലഭിച്ചിരുന്ന റിപ്പോര്‍ട്ട്. എന്നാൽ ചിത്രത്തിന്‍റെ റിലീസ് ഡിസംബർ 12ലേക്ക് മാറ്റിയതായി പുതിയ അറിയിപ്പ് ചിത്രത്തിന്‍റെ അണിയറപ്രവർത്തകര്‍ പുറത്തുവിട്ടിട്ടുമുണ്ട്. മലയാളത്തിന് പുറമെ തമിഴ്, തെലുങ്ക്, ഹിന്ദി ഭാഷകളിലും ചിത്രം എത്തുന്നുണ്ട്. ചിത്രത്തിന്‍റേതായി പുറത്തിറങ്ങിയ പോസ്റ്ററുകളും ട്രെയിലറും ടീസറുമെല്ലാം ഏറെ വൈറലായിരുന്നതാണ്.

ഉണ്ണി മുകുന്ദൻ, സുദേവ് നായര്‍, അച്യുതൻ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. കാവ്യ ഫിലിംസിന്‍റെ ബാനറില്‍ വേണു കുന്നപ്പള്ളിയാണ് മാമാങ്കം നിര്‍മ്മിച്ചിരിക്കുന്നത്. സംവിധാനം എം.പത്മകുമാറാണ്.

Also Read: ധൈര്യത്തിൻ്റെ ചരിത്രം, 'മാമാങ്കം' പുത്തൻ ചിത്രങ്ങൾ

18-ാം നൂറ്റാണ്ടിന് മുമ്പ് കേരള മണ്ണിൽ ജീവൻവെടിഞ്ഞ ധീര ചാവേറുകളുടെ ഇതിഹാസ കഥയാണ് ചിത്രം. ചിത്രത്തിന്‍റെ തിരക്കഥ ഒരുക്കിയിരിക്കുന്നത് പതിനെട്ടാംപടി സംവിധാനം ചെയ്ത ശങ്കര്‍ രാമകൃഷ്ണനാണ് എന്നതാണ് പ്രത്യേകത. ഒരു വടക്കൻ വീരഗാഥ, കേരള വർമ്മ പഴശ്ശിരാജ എന്നീ ചരിത്ര സിനിമകള്‍ക്ക് ശേഷം വീണ്ടും മമ്മൂട്ടി ഒരു ചരിത്രപ്രധാന്യമുള്ള ചിത്രവുമായെത്തുകയാണ്.