ചലച്ചിത്ര പുരസ്‍കാര വിതരണം: മോഹന്‍ലാല്‍ എത്തി

തിരുവനന്തപുരം: സംസ്ഥാന ചലച്ചിത്ര പുരസ്‍കാരദാന ചടങ്ങിന് മുഖ്യാതിഥിയായി മോഹന്‍ലാല്‍ എത്തി. മോഹന്‍ലാലിനെ മുഖ്യാതിഥിയായി ക്ഷണിക്കുന്നതിന് എതിരെ സിനിമ മേഖലയിലുള്ളവരുള്‍പ്പെടെയുള്ള 107 പേര്‍ നിവേദനം നല്‍കിയിരുന്നു.

തിരുവനന്തപുരം നിശാഗന്ധി ഓഡിറ്റോറിയത്തിലാണ് ചടങ്ങ്. സമഗ്ര സംഭാവനയ്ക്കുള്ള ജെ.സി.ഡാനിയല്‍ പുരസ്‌കാരം ശ്രീകുമാരന്‍ തമ്പി സ്വീകരിച്ചു.

പ്രിയപ്പെട്ടവര്‍ ആദരിക്കപ്പെടുമ്പോള്‍ അവിടെയത്തുക കടമയാണെന്ന് മോഹന്‍ലാല്‍. സ്വന്തം നാട്ടിലാണ് ചലച്ചിത്ര പുരസ്‍കാരച്ചടങ്ങ് നടക്കുന്നത് എന്നതില്‍ അഭിമാനമുണ്ട്. നിങ്ങൾക്കിടയിലേക്ക് വരാൻ എനിക്ക് ആരുടേയും അനുവാദം വേണ്ട.

ചലച്ചിത്ര താരം എന്ന നിലയിലല്ല, ഇന്ത്യന്‍ സിനിമയിലെ ആദ്യ നിര അഭിനേതാക്കളില്‍ ഒരാള്‍ എന്ന രീതിയിലാണ് മോഹന്‍ലാലിനെ ചടങ്ങിലേക്ക് ക്ഷണിച്ചതെന്ന് മുഖ്യമന്ത്രി പിണറായി വിജയന്‍ പറഞ്ഞു.

മികച്ച ചിത്രമായി തെരഞ്ഞെടുക്കപ്പെട്ട ഒറ്റമുറിവെളിച്ചത്തിൻ്റെ സംവിധായകനും നിര്‍മാതാവുമായ രാഹുല്‍ റിജി നായര്‍, രണ്ടാമത്തെ ചിത്രമായ ഏദൻ്റെ സംവിധായകന്‍ സഞ്ജു സുരേന്ദ്രന്‍, നിര്‍മ്മാതാവ് മുരളി മാട്ടുമ്മല്‍, മികച്ച സംവിധായകന്‍ ലിജോ ജോസ് പെല്ലിശ്ശേരി, മികച്ച നടന്‍ ഇന്ദ്രന്‍സ്, മികച്ച നടി പാര്‍വതി, സ്വഭാവ നടന്‍ അലന്‍സിയര്‍, സ്വഭാവ നടി പോളി വല്‍സന്‍, തിരക്കഥാകൃത്ത് സജീവ് പാഴൂര്‍, സംഗീത സംവിധായകന്‍ എം.കെ. അര്‍ജുന്‍, ഗായകന്‍ ഷഹബാസ് അമന്‍, ഗായിക സിതാര കൃഷ്ണകുമാര്‍, നവാഗത സംവിധായകന്‍ മഹേഷ് നാരായണന്‍ തുടങ്ങി അഭിനേതാക്കളും സാങ്കേതിക പ്രവര്‍ത്തകരുമായ 43 പേരാണ് പുരസ്‍കാരങ്ങള്‍ സ്വീകരിക്കുന്നത്.