'കാവല്' കട്ടപ്പനയിൽ തുടങ്ങി; സുരേഷ് ഗോപി ചിത്രത്തിൽ നായികയായി സയാ
എനിക്ക് കാവലായി ദൈവം
"സത്യം തെളിയുന്നതുവരെ, കുടുംബത്തിനും, നിങ്ങൾക്കും കാവലായി ഞാനും, എനിക്ക് കാവലായി ദൈവവും ഉണ്ട്", എന്ന് കുറിച്ചുകൊണ്ടാണ് കാവൽ സിനിമയുടെ ഷൂട്ടിംഗ് ആരംഭിക്കുന്ന വിവരം നടൻ സുരേഷ് ഗോപി ഫേസ്ബുക്കിലൂടെ പങ്കുവെച്ചിരിക്കുന്നത്.
ഇനി ലേലം 2 ആണോ !
സുരേഷ് ഗോപി ചിത്രത്തിൽ പോലീസ് വേഷത്തിലാണോ അല്ലയോ എന്നൊന്നും ഇതുവരെ റിപ്പോർട്ടുകൾ പുറത്തുവന്നിട്ടില്ല. 1997-ൽ രഞ്ജി പണിക്കർ തിരക്കഥയൊരുക്കി ജോഷി ഒരുക്കിയ ലേലം എന്ന സിനിമയുടെ രണ്ടാം ഭാഗം ഒരുക്കുമെന്ന് മുമ്പ് നിഥിൻ പ്രഖ്യാപിച്ചിരുന്നു. ഇനി കാവൽ ലേലം രണ്ടാം ഭാഗമാണോയെന്നും ആരാധകർക്കിടയിൽ ചർച്ചകൾ നടക്കുന്നുണ്ട്.
നായികയായി സയാ
ഇരുപത്തിയൊന്നും നൂറ്റാണ്ടിലൂടെ മലയാളസിനിമയിൽ അരങ്ങേറിയ സയാ ഡേവിഡ് കാവലിൽ ശ്രദ്ധേയമായ കഥാപാത്രത്തെ അവതരിപ്പിക്കുന്നു. ആദ്യചിത്രത്തിന് ശേഷം അധികം അവസരങ്ങൾ സയയ്ക്ക് ലഭിച്ചിരുന്നില്ല, അതിനിടയിലാണ് കാവലിൽ നായികയാകാൻ അവസരം ലഭിച്ചിരിക്കുന്നത്.
കാവലിൽ ലാലും
നടനും സംവിധായകനും നിർമ്മാതാവുമൊക്കെയായ ലാൽ കാവലിൽ ശക്തമായ ഒരു കഥാപാത്രത്തെ അവതരിപ്പിക്കുന്നുണ്ട്. ലാലും സുരേഷ് ഗോപിയും ഒന്നിച്ച കളിയാട്ടം, തെങ്കാശിപട്ടണം തുടങ്ങി നിരവധി സിനിമകൾ വൻ വിജയമായിരുന്നു.
കസബയിൽ നിന്ന് കാവലിലേക്ക്
2016-ലാണ് നിഥിൻ മമ്മൂട്ടിയെ നായകനാക്കി കസബ ഒരുക്കിയത്. ഇപ്പോഴിതാ നാല് വർഷങ്ങൾക്ക് ശേഷമാണ് നിഥിൻ അടുത്ത സിനിമയുമായി എത്താനൊരുങ്ങുന്നത്. ഐ എം വിജയൻ,അലൻസിയാർ,പത്മരാജ് രതീഷ്,സുജിത് ശങ്കർ,സന്തോഷ് കീഴാറ്റൂർ,കിച്ചു ടെല്ലസ്,ബിനു പപ്പു,മോഹൻ ജോസ്,കണ്ണൻ രാജൻ പി ദേവ്,മുരുകൻ,മുത്തുമണി തുടങ്ങിയവരാണ് ചിത്രത്തിലെ മറ്റു പ്രമുഖ താരങ്ങൾ.
ഛായാഗ്രഹണം നിഖിൽ എസ് പ്രവീൺ നിർവ്വഹിക്കുന്നു.സംഗീതം-രഞ്ജിൻ രാജ്,എഡിറ്റർ-മൻസൂർ മുത്തൂട്ടി,കല-ദിലീപ് നാഥ്,മേക്കപ്പ്-പ്രദീപ് രംഗൻ,വസ്ത്രാലങ്കാരം-നിസ്സാർ,സ്റ്റില്സ്-മോഹന് സുരഭി,പരസ്യകല-ഒാള്ഡ് മങ്കസ്,പ്രൊഡക്ഷൻ കൺട്രോളർ-സഞ്ജയ് പടിയൂർ,വാര്ത്ത പ്രചരണം-എ എസ് ദിനേശ്.