നടി ദിവ്യ ഉണ്ണി വിവാഹ മോചിതയാകുന്നതായി റിപ്പോർട്ട്

മലയാള സിനിമ ലോകത്ത് നിന്ന് ഒരു വിവാഹ മോചന വാർത്ത കൂടി. നടി ദിവ്യാ ഉണ്ണി വിവാഹ മോചനത്തിന് ഒരുങ്ങുന്നതായാണ് പുതിയ റിപ്പോർട്ട്. ഒരു മലയാള മാധ്യമത്തിന് നൽകിയ അഭിമുഖത്തിലാണ് താരം ഇത് സംബന്ധിക്കുന്ന സൂചന നൽകിയത്.

അഭിമുഖത്തിൽ ദിവ്യ പറയുന്നതിങ്ങനെ 'കൂട്ടുകാരോട് വേര്‍പിരിയുമ്പോള്‍ പോലും എനിക്ക് കരച്ചില്‍ വരുമായിരുന്നു. അങ്ങനെയുള്ള എനിക്കാണ് ജീവിതത്തിലെ ഏറ്റവും വലിയ വേര്‍പിരിയല്‍ നേരിടേണ്ടി വന്നത്. ജീവിതാവസാനം വരെ ഒപ്പമുണ്ടാവേണ്ട ആളുമായി വേര്‍പിരിഞ്ഞു. ആരും തളര്‍ന്ന് പോകും. പക്ഷെ എനിക്ക് തിരിച്ചുവരണം. ജീവിതത്തില്‍ സുഖങ്ങള്‍ മാത്രം ഉണ്ടാവണമെന്നല്ലേ നമ്മുടെ പ്രാര്‍ഥന. ദുഃഖം കൂടെ വരുമ്പോഴേ ജീവിതം പൂര്‍ണമാകുന്നുള്ളൂ. ആര്‍ക്കാണ് നല്ല നേരവും ചീത്ത നേരവും ഇല്ലാത്തത്'.

ഇനിയുള്ള ജീവിതം തന്റെ മക്കള്‍ക്ക് വേണ്ടിയാണെന്നും മലയാള സിനിമയില്‍ കൂടുതല്‍ സജീവമാകാനാണ് ഉദ്ദേശിക്കുന്നതെന്നും ദിവ്യ പറയുന്നു.

2002ലായിരുന്നു അടുത്ത ബന്ധു കൂടിയായ ഡോ. സുധീര്‍ ശേഖറുമായുള്ള ദിവ്യാ ഉണ്ണിയുടെ വിവാഹം. വിവാഹത്തിന് ശേഷം ദിവ്യ ഭര്‍ത്താവിനൊപ്പം അമേരിക്കയില്‍ സ്ഥിര താമസമാക്കിയിരുന്നു.