പൃഥ്വിരാജിൻ്റെ സംവിധാനത്തെ പറ്റി മഞ്ജു വാര്യര്‍ പറയുന്നു

പൃഥ്വിരാജ് ആദ്യമായി സംവിധാനം ചെയ്യുന്ന ലൂസിഫര്‍ ഷൂട്ടിങ് പൂര്‍ത്തിയാക്കിയത് കഴിഞ്ഞ ആഴ്ചയാണ്. മോഹൻലാൽ നായകനാകുന്ന ചിത്രത്തിൽ മഞ്ജു വാര്യരാണ് നായിക. അടുത്തിടെ മഞ്ജു നൽകിയ ഒരു അഭിമുഖത്തിൽ പൃഥ്വിരാജിനെ കുറിച്ച് സംസാരിച്ചിരുന്നു. അതാണ് ഇപ്പോൾ വൈറലാകുന്നത്. ഒടിയന് ശേഷം മോഹൻലാലിൻ്റെ നായികയായി മഞ്ജു എത്തുന്ന ചിത്രം ഏറെ മാധ്യമ ശ്രദ്ധ ആകര്‍ഷിച്ചിരുന്നു. ഇതെ തുടര്‍ന്ന് പൃഥ്വിരാജിനെ പറ്റിയുള്ള അവതാരികയുടെ ചോദ്യത്തിന് മഞ്ജു നൽകിയ മറുപടി പൃഥ്വി ആരാധകരം പുളകം കൊള്ളിക്കുന്നതാണ്.

പൃഥ്വിയെ പറ്റി മഞ്ജു വാര്യര്‍ പറയുന്നത്...

'ലൂസിഫറിൻ്റെ സെറ്റില്‍ വെച്ചാണ് രാജുവുമായി അടുത്ത് സംസാരിക്കുന്നത്. ചടങ്ങുകളില്‍ വെച്ച് കാണാറുണ്ടങ്കിലും സംസാരിക്കാറില്ലായിരുന്നു. അതുമല്ല രാജുവിൻ്റെ ഒപ്പം അഭിനയിക്കാനും അവസരം കിട്ടിയിട്ടില്ല. അഭിനേതാവായി ജോലി ചെയ്യുന്നതും സംവിധായകനായി ജോലി ചെയ്യുന്നതും തമ്മില്‍ താരതമ്യം ചെയ്യാന്‍ ഞാൻ സമർത്ഥയല്ല. സെറ്റില്‍ എത്തിയ ആദ്യ ദിവസം മാത്രമാണ് നടന്‍ പൃഥ്വിരാജ് സംവിധാനം ചെയ്യുന്നു എന്ന തോന്നലുണ്ടായത്. പിന്നീട് പരിചയ സമ്പന്നനായ ഒരാളാണ് സംവിധാനം ചെയ്യുന്നതെന്ന് തോന്നി. ഏറ്റവും അനുഭവസമ്പത്തുളള സംവിധായകരുടെ പക്വതയും വ്യക്തതയുമാണ്‌ പൃഥ്വിരാജില്‍ കാണാനാവുന്നത്'

ആശിര്‍വാദിൻ്റ ബാനറില്‍ ആൻ്റണി പെരുമ്പാവൂ‍‍ർ നിര്‍മ്മിക്കുന്ന ചിത്രത്തിന് രചന നി‍ർവഹിക്കുന്നത് മുരളിഗോപിയാണ്. 'മോഹന്‍ലാലിന്‍റെ ആരാധകര്‍ ഇഷ്ടപ്പെടുന്ന സിനിമയാകും ലൂസിഫര്‍, ഞാന്‍ ഇഷ്ടപ്പെടുന്ന പല സവിശേഷതകളും മോഹന്‍ലാലിലുണ്ട്. അതെല്ലാം ലൂസിഫറിലുമുണ്ടാകും, ഇരുട്ടിൻ്റെ രാജകുമാരന്‍ തന്നെയാണ് ലൂസിഫര്‍. രാഷ്ട്രീയം മാത്രമല്ല മറ്റു പലതും സിനിമയിലുണ്ടെന്നും തിരക്കഥാകൃത്ത് മുരളീഗോപി മുൻപ് പറഞ്ഞിരുന്നു. ലൂസിഫറില്‍ വില്ലനായെത്തുന്നത് ബോളിവുഡ് നടന്‍ വിവേക് ഒബ്റോയിയാണ്. ടോവിനോ തോമസും ചിത്രത്തില്‍ പ്രധാന വേഷത്തിലെത്തുന്നുണ്ട്.

റഷ്യയിലായിരുന്നു ചിത്രത്തിൻ്റെ അവസാന ഘട്ട ചിത്രീകരണം നടന്നത്. ചിത്രത്തിൻ്റേതായി പുറത്തിറങ്ങിയ പോസ്റ്ററുകളും ടീസറും ഏറെ പ്രേക്ഷക ശ്രദ്ധ ആക‍ഷിച്ചിരുന്നു.