പോലീസുകാരനെ മ‍ർദ്ദിച്ച കന്നടനടിക്ക് തടവ് ശിക്ഷ

മൊബൈല്‍ ഫോണില്‍ സംസാരിച്ച്‌ കാര്‍ ഓടിച്ചത് ചോദ്യം ചെയ്ത പോലീസുകാരനെ മര്‍ദ്ദച്ച കന്നട നടി മൈത്രിയ ഗൗഡയ്ക്കും സുഹൃത്തുക്കളായ രൂപ, രേഖ എന്നിവര്‍ക്കും ഒരു വര്‍ഷം തടവുശിക്ഷ. തടവിന് പുറമെ മൈത്രിക്ക് മൂവായിരം രൂപ പിഴയും ചുമത്തി. നടിയുടെ സുഹൃത്തുക്കള്‍ ആയിരം രൂപ പിഴ അടയ്ക്കണം. 2011ല്‍ ബസവേശ്വര നഗസിലാണ് കേസിനാസ്പദമായ സംഭവം നടന്നത്.

മൊബൈല്‍ ഫോണില്‍ സംസാരിച്ച്‌ കാറോടിക്കുന്നത് കണ്ട പോലീസുകാരന്‍ നടിയോട് പിഴ അടയക്കാന്‍ ആവശ്യപ്പെട്ടു. ഇതില്‍ പ്രകോപിതരായ നടിയും സുഹൃത്തുക്കളും പോലീസുകാരനെ മര്‍ദ്ദിക്കുകയായിരുന്നു. വിജയനഗര്‍ പോലീസ് സ്റ്റേഷനിലെ ഹെഡ്കോണ്‍സ്റ്റബിള്‍ ശിവകുമാറിനാണ് മര്‍ദ്ദനമേറ്റത്. ശിവകുമാര്‍ നടിയുടെ കാറിന്‍റെ നന്പര്‍ മൊബൈല്‍ ഫോണില്‍ പകര്‍ത്താന്‍ ശ്രമിച്ചപ്പോള്‍ ഇവര്‍ ഫോണ്‍ പിടിച്ചു വാങ്ങുകയും ചെയ്തു.

കയ്യേറ്റത്തില്‍ പരുക്കേറ്റ പോലീസുകാരന്‍ ആശുപത്രിയില്‍ ചികിത്സ തേടിയിരുന്നു. കേന്ദ്രമന്ത്രി സദാനന്ദ ഗൗഡയുടെ മകന്‍ കാര്‍ത്തിക് വിവാഹ വാഗ്ദാനം നല്‍കി പീഡിപ്പിച്ചുവെന്ന് ആരോപിച്ച്‌ രംഗത്ത് വന്നതിലൂടെ ശ്രദ്ധേയയായ നടിയാണ് മൈത്രിയ.