'തലൈവി'യിൽ ആരാധകർക്ക് പ്രതീക്ഷയേറുന്നു, ടീമിനൊപ്പം ഷംന കാസിമും!

തമിഴ്നാട് മുൻ മുഖ്യമന്ത്രി ജയലളിതയുടെ ജീവിതം പറയുന്ന തലൈവി എന്ന ചിത്രത്തിൽ ആരാധകർക്കുള്ള പ്രതീക്ഷ ദിനം പ്രതി വർധിക്കുകയാണ് ഇപ്പോൾ. ബോളിവുഡ് നടി കങ്കണ റണാവത്താണ് ജയലളിതയായി സ്ക്രീനിൽ എത്തുന്നത്. മദ്രാസ്‌പട്ടണം', 'ദൈവതിരുമകള്‍' എന്നീ സിനിമകളൊരുക്കി ശ്രദ്ധ നേടിയ സംവിധായകൻ എഎൽ വിജയ് ആണ് ചിത്രമൊരുക്കുന്നത്.

ചിത്രത്തിൻ്റെ ടീമിനൊപ്പം നടി ഷംന കാസിമും ചേരുകയാണ്. അണിയറപ്രവർത്തകർ പുറത്ത് വിട്ട ഏറ്റവും പുതിയ വിവരങ്ങളാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. ചിത്രത്തിനൊപ്പം ചേർന്നതിൻ്റെ സന്തോഷം തമിഴകത്ത് പൂർണ എന്ന പേരിൽ അറിയപ്പെടുന്ന നടി ഷംന കാസിം ട്വിറ്ററിലൂടെ പങ്കുവെച്ചു.

Also Read: എന്തുകൊണ്ട് എനിക്ക് മലയാളത്തില്‍ നല്ല കഥാപാത്രങ്ങള്‍ ലഭിക്കുന്നില്ല? മറുപടി വിചിത്രം: ഷംന കാസിം

ചിത്രത്തിൽ എംജിആറായി എത്തുന്നത് അരവിന്ദ് സാമിയാണ്. അരവിന്ദിൻ്റെ പുത്തൻ മേക്കോവർ ലുക്ക് ചിത്രങ്ങൾ സോഷ്യൽ മീഡിയയിൽ വൈറലായിരുന്നു. ചിത്രത്തിൽ പ്രിയമണിയാണ് ജയലളിതയുടെ ഏറ്റവും അടുത്ത കൂട്ടുകാരിയും സന്തതസഹചാരിയുമായ വികെ ശശികലയായി സ്ക്രീനിലെത്തുന്നത്.

Also Read: സിനിമയിൽ മറ്റൊരു ചരിത്രമായി മാറാനൊരുങ്ങി 'സൂഫി'; കൂടുതൽ അണിയറ വിശേഷങ്ങൾ അറിയണ്ടേ?

മുൻപ് ചിത്രത്തിലേതായി പുറത്ത് വിട്ട പച്ച സാരി ചുറ്റിയുള്ള ഫസ്റ്റ് ലുക്ക് പോസ്റ്ററിൽ ജയലളിതയായുള്ള കങ്കണയുടെ രൂപത്തെ വിമർശിച്ച് പലരും രംഗത്തെത്തിയിരുന്നു. ജയലളിതയുടെ ജന്മവാർഷികത്തിൽ, മറ്റൊരു മുഖമായി കങ്കണ പ്രത്യക്ഷപ്പെട്ടിരിക്കുകയാണ് ഇപ്പോൾ. കറുപ്പും ചുവപ്പും ബോർഡറുള്ള വെള്ള സാരി ചുറ്റി പൊട്ടുതൊട്ടുള്ള ലുക്കിലാണ് കങ്കണ എത്തിയിരിക്കുന്നത്. ജയലളിതയുടെ ഈ ലുക്കിലുള്ള യഥാർത്ഥ ചിത്രം ഗൂഗിളിൽ ലഭ്യമാണ്. അതേ ലുക്കിലാണ് കങ്കണയുടെ പുത്തൻ ചിത്രം. 2020 ജൂൺ 26 ന് ചിത്രം തീയേറ്ററുകളിലെത്തിക്കാനാണ് വിഭാവനം ചെയ്തിരിക്കുന്നത്.