നവ്യയുടെ തിരിച്ചു വരവ് എങ്ങനെയുണ്ടെന്നുള്ള ആകാംക്ഷയിലാണ് പോയത്‌! രാധാമണിയെ കണ്ടപ്പോൾ എനിക്കെന്റെ ചേച്ചിയെ പോലെ തോന്നിയെന്നും സ്നേഹ ശ്രീകുമാർ

ഒരുത്തിയിലെ കഥാപാത്രത്തെക്കുറിച്ച് കേട്ടപ്പോള്‍ത്തന്നെ ഇത് ചെയ്യണമെന്ന് തോന്നിയിരുന്നുവെന്ന് നവ്യ പറഞ്ഞിരുന്നു. 10 വര്‍ഷമായി അഭിനയരംഗത്തുനിന്നും മാറി നില്‍ക്കുകയായിരുന്ന താരം ഒരുത്തിയിലൂടെ ഗംഭീരമായൊരു തിരിച്ചുവരവാണ് നടത്തിയത്. രണ്ടാംവരവ് കിടുക്കിയെന്നായിരുന്നു സിനിമ കണ്ടവരെല്ലാം പറഞ്ഞത്. ചിത്രത്തെക്കുറിച്ചുള്ള തന്റെ അഭിപ്രായം രേഖപ്പെടുത്തിയിരിക്കുകയാണ് സ്നേഹ ശ്രീകുമാർ. ഫേസ്ബുക്ക് കുറിപ്പിലെ വിശേഷങ്ങളിലൂടെ വിശദമായി വായിക്കാം.
ഇന്നലെയാണ് ഒരുത്തീ സിനിമ കാണാൻ സാധിച്ചത്. നവ്യയുടെ തിരിച്ചു വരവ് എങ്ങിനെയുണ്ടെന്നുള്ള ആകാംക്ഷയിൽ തന്നെയാണ് തിയേറ്ററിൽ കേറിയത്‌. ഒരു സാധാരണ വീട്ടമ്മയുടെ എല്ലാ ഉത്തരവാദിത്തവും വളരെ വേഗത്തിൽ ചെയ്തുതീർത്ത് ഓടിക്കൊണ്ടേയിരിക്കുന്ന രാധാമണിയെ കണ്ടപ്പോൾ എവിടെയെക്കയോ എന്റെ ചേച്ചിയെപോലെ തോന്നി. എന്റെ ചേച്ചിയും ഇങ്ങനെയാണ് കുറെ ജോലികളും, ഉത്തരവാദിത്തങ്ങളും അതിനിടയിൽ തിരുവാതിരയും.
സിനിമയുടെ തുടർച്ചയിൽ നവ്യനായർ എന്ന നടി ആ കഥാപാത്രത്തിനു വേണ്ടി എടുത്ത ശ്രമങ്ങൾ വലുതാണ്. ഒരമ്മയുടെ, മകളുടെ, ഭാര്യയുടെ സർവോപരി ഒരു സ്ത്രീയുടെ ഉറച്ചമനസും, ജീവിക്കാൻവേണ്ടി അവസ്ഥകളോടുള്ള യുദ്ധവും വളരെ നന്നായി തന്നെ നവ്യ അവതരിപ്പിച്ചു. തിരിച്ചുവരവിന് തിരഞ്ഞെടുത്ത കഥാപാത്രം ഏറ്റവും യോജിച്ചതായി എന്ന് സിനിമ കണ്ടിറങ്ങുന്നവർക്ക് തോന്നും. ഇനിയും നല്ല സിനിമകളുടെ ഭാഗമാകാൻ നവ്യയ്ക്ക് കഴിയട്ടെയെന്നു ആശംസിക്കുന്നു .
ഒരുത്തിയിൽ എടുത്തു പറയേണ്ടതാണ് വിനായകന്റെ എസ് ഐ ആന്റണിസാർ. കഴിഞ്ഞദിവസം പട സിനിമയിൽ കണ്ട വിനായകനെയല്ല ഇതിലെ പോലീസ്. ശരിക്കും വിനായകനിലെ അഭിനേതാവ് ഞെട്ടിക്കുകയാണ് ഓരോ സിനിമയിലും എന്നുമായിരുന്നു സ്നേഹ ശ്രീകുമാർ കുറിച്ചത്. സ്നേഹയ്ക്ക് നന്ദി പറഞ്ഞ് നവ്യ നായരും ഈ പോസ്റ്റ് ഷെയർ ചെയ്തിരുന്നു. ഭാവനയും ഒരുത്തിയെ അഭിനന്ദിച്ച് എത്തിയിരുന്നു.