ജെസിയെപ്പോലെ ജാനുവിനെ സ്‌നേഹിച്ചതിന് നന്ദിയെന്ന് തൃഷ

വിജയ് സേതുപതിയും തൃഷയും ആദ്യമായി ഒന്നിച്ച 96 മികച്ച രീതിയിൽ പ്രേക്ഷക സ്വീകാര്യത നേടി മുന്നേറുകയാണ്. ചിത്രത്തിൽ തൃഷ അവതരിപ്പിച്ച ജാനുവിനെ പ്രേക്ഷകര്‍ ഇരുകൈയും നീട്ടി സ്വീകരിച്ചതിന് പ്രേക്ഷകരോട് നന്ദി അറിയിച്ച് എത്തിയിരിക്കുകയാണ് താരം. തൻ്റെ ട്വിറ്ററിലൂടെയാണ് താരം ആരാധകര്‍ക്ക് നന്ദി അറിയിച്ചിരിക്കുന്നത്.


അത്ഭുതപ്പെടുത്തുന്ന ഈ പ്രതികരണത്തിന് എല്ലാവരോടും നന്ദി. സ്‌നേഹത്തിൻ്റെ നിലയ്ക്കാത്ത ഒഴുക്കാണ്. 96ലെ ജാനുവിനെ നിങ്ങള്‍ മനസിലാക്കി എന്നതും അവളെ സ്‌നേഹിച്ചു എന്നതും എന്നെ ഏറെ സന്തോഷിപ്പിക്കുന്നു. ഒരു കൂട്ടായ ശ്രമത്തിൻ്റേതായിരുന്നു ഈ ചിത്രം. പ്രണയത്തിൻ്റെ മാന്ത്രികതയെക്കുറിച്ച്‌ എപ്പോഴെങ്കിലുമൊക്കെ തോന്നിയിട്ടുള്ളതൊക്കെ ഞങ്ങളെല്ലാം ഈ സിനിമയിലേക്ക് പകര്‍ന്നിട്ടുണ്ട്, തൃഷ ട്വിറ്ററില്‍ കുറിച്ചു.

റൊമാൻ്റിക് ഡ്രാമയാണ് 96. സ്‌കൂള്‍ കാലം മുതല്‍ പ്രണയം സൂക്ഷിക്കുന്ന രണ്ടുപേര്‍ 22 വര്‍ഷങ്ങള്‍ക്ക് ശേഷം നടക്കുന്ന റീയൂണിയന്‍ വേദിയില്‍ കണ്ടുമുട്ടുന്നതാണ് ചിത്രത്തിൻ്റെ ഇതിവൃത്തം. സി പ്രേംകുമാര്‍ ആണ് ചിത്രം സംവിധാനം ചെയ്തിരിക്കുന്നത്. റാം എന്ന കഥാപാത്രത്തെയാണ് വിജയ് സേതുപതി അവതരിപ്പിച്ചിരിക്കുന്നത്.