പദ്മാവത് വിവാദം കെട്ടടങ്ങുമ്പോള്‍ 'മണികര്‍ണിക'യ്‌ക്കെതിരെ ബ്രാഹ്മണസംഘടന.

സഞ്ജയ് ലീലാ ബന്‍സാലിയുടെ പദ്മാവദ് വിവാദങ്ങള്‍ക്കു ശേഷം തിയേറ്ററുകളില്‍ നിറഞ്ഞോടുമ്പോള്‍ പുതിയ പ്രതിഷേധവുമായി വീണ്ടും രാജസ്ഥാന്‍. ഇത്തവണ കങ്കണാ റണൗട്ട് നായികയാകുന്ന 'മണികര്‍ണിക' എന്ന ചിത്രത്തിന് നേരെയാണ് പ്രതിഷേധമുയര്‍ന്നിരിക്കുന്നത്.

പദ്മാവതിനെതിരേ ശബ്ദമുയര്‍ത്തിയത് രജപുത്രവിഭാഗമായ കര്‍ണി സേനയായിരുന്നെങ്കില്‍ മണികര്‍ണികയ്‌ക്കെതിരേ രംഗത്തെത്തിയിരിക്കുന്നത് അവിടത്തെ സര്‍വബ്രാഹ്മണ സഭയാണ്. ഝാന്‍സിയിലെ റാണി ലക്ഷ്മിഭായിയെ കുറിച്ചുളള ചിത്രമാണ് മണികര്‍ണിക . ചിത്രത്തില്‍ ചരിത്രത്തെ വളച്ചൊടിക്കാനുളള ശ്രമമുണ്ടെന്നാണ് സഭ ആരോപിക്കുന്നത്.

ചിത്രത്തില്‍ ഝാന്‍സി റാണി ബ്രിട്ടീഷ് ഈസ്റ്റ് ഇന്ത്യാ കമ്പനി ഏജന്റിനെ പ്രണയിക്കുന്ന പാട്ടുരംഗമുണ്ടെന്നാണ് ഇവര്‍ ചൂണ്ടിക്കാട്ടുന്നത്. പദ്മാവതിനുനേരേയുണ്ടായ പ്രക്ഷോഭം പോലെ ഇൗ ചിത്രത്തിനെതിരേയും പ്രതിഷേധമുണ്ടാകുമെന്ന് സഭ ജയ്പുരില്‍ നടത്തിയ പത്രസമ്മേളനത്തില്‍ പറഞ്ഞു.

കങ്കണാ റണൗട്ടിനൊപ്പം സോനു സൂദ്, സുരേഷ് ഒബ്‌റോയ്, അതുല്‍ കുല്‍ക്കര്‍ണി തുടങ്ങിയവരാണ് ചിത്രത്തില്‍ അഭിനയിക്കുന്നത്.