ആദ്യം ഷെയ്ൻ-അമ്മ ചർച്ച; അതിനുശേഷം വിലക്ക് നീക്കുന്ന കാര്യത്തിൽ ചർച്ച

കൊച്ചി: നടൻ ഷെയ്ൻ നിഗവും നിര്‍മ്മാതാക്കളുടെ സംഘടനുമായുള്ള പ്രശ്നങ്ങൾ ഒത്തു തീര്‍ക്കുന്നതിനായി ജനുവരി 9ന് ഷെയ്ൻ നിഗവുമായി താരസംഘടനയായ അമ്മയുടെ ഭാരവാഹികൾ ചർച്ച നടത്തും. ഷെയ്ൻ നിഗവും ഇതിൽ പങ്കെടുക്കും. ഇക്കഴിഞ്ഞ 22ന് നടക്കേണ്ട ചർച്ച അമ്മ സംഘടനയുടെ പ്രസിഡന്‍റ് മോഹൻലാലിന്‍റെ തിരക്കുകള്‍ മൂലമാണ് നീണ്ടുപോയത്.

ഈ ചർച്ചയ്ക്ക് ശേഷം ഷെയ്ൻ നൽകുന്ന ഉറപ്പുകളുടെ അടിസ്ഥാനത്തിൽ നിര്‍മ്മാതാക്കളുടെ സംഘടനുമായി അമ്മ ചര്‍ച്ച നടത്തും. ഫെഫ്കയുടെ പിന്തുണയോടെയായിരിക്കും ഈ ചര്‍ച്ച നടത്തുന്നത്. നിര്‍മ്മാതാക്കളടെ സംഘടനാ പ്രതിനിധികളും അമ്മ ഭാരവാഹികളും അനൗദ്യോഗികമായി ഇതിനോടകം തന്നെ പലവുരി ചര്‍ച്ചകള്‍ നടത്തി കഴിഞ്ഞിട്ടുണ്ട്. പ്രശ്നങ്ങള്‍ രമ്യമായി പരിഹരിക്കാമെന്നാണ് ഇതിനകം ഇരുവിഭാഗത്തിന്‍റേയും നിലപാട് വന്നിട്ടുള്ളത്.

Also Read: ഒത്തുതീര്‍പ്പ് ചര്‍ച്ച; ഷെയ്ന്‍ നിഗത്തെ 'അമ്മ' വിളിച്ചു വരുത്തും

എന്നാൽ നിര്‍മ്മാതാക്കളെ മനോരോഗികളെന്ന വിഷയത്തിൽ ഷെയ്ന്‍ പരസ്യമായി മാപ്പ് പറയാതെ വിട്ടു വീഴ്ചയ്ക്കില്ലെന്നാണ് നിര്‍മ്മാതാക്കളുടെ നിലപാട്. ഇതോടെയാണ് അമ്മ വീണ്ടും പ്രശ്നത്തില്‍ ഇടപെടാന്‍ തീരുമാനിച്ചിട്ടുള്ളത്. നിര്‍മ്മാതാക്കളുടെ നിലപാട് പ്രശ്ന പരിഹാരത്തില്‍ നിര്‍ണ്ണായകമായിരിക്കും. ഷെയ്നുമായി നേരിട്ട് ചര്‍ച്ചയ്ക്കില്ലെന്ന് നിര്‍മ്മാതാക്കള്‍ മുമ്പ് വ്യക്തമാക്കിയിരുന്നു. തുടര്‍ന്നാണ് അമ്മ ഇടപെടേണ്ട സാഹചര്യമുണ്ടായത്. ഇതിനകം സോഷ്യൽമീഡിയ മുഖേനയും ഇ-മെയിൽ വഴിയും ഷെയ്ൻ നിര്‍മ്മാതാക്കളോട് ഖേദം പ്രകടിപ്പിച്ചുകഴിഞ്ഞിട്ടുണ്ട്.

ഷെയ്നിന് വിലക്ക് കൽപ്പിച്ചതോടെ മുടങ്ങിയ ഉല്ലാസം സിനിമയുടെ ഡബ്ബിംഗും വെയിൽ , കുർബാനി എന്നീ സിനിമകളുടെ ചിത്രീകരണവും പൂർത്തിയാക്കാമെന്ന് ഷെയ്നെ വിളിച്ചുവരുത്തി രേഖാമൂലം ഉറപ്പ് വാങ്ങുമെന്നും സൂചനയുണ്ട്. ഈ വർഷം നടക്കേണ്ടിയിരുന്ന മുടങ്ങിപ്പോയ സിനിമകളുടെ ചിത്രീകരണം പൂർത്തിയാക്കാമെന്ന് ഷെയ്ൻ നേരത്തെ തന്നെ ഉറപ്പ് നൽകിയിട്ടുമുണ്ട്. ഷെയ്ൻ നായകനായി ഒടുവിൽ പുറത്തിറങ്ങിയ വലിയ പെരുന്നാൾ ഇപ്പോൾ തീയേറ്ററുകളിൽ സമ്മിശ്ര പ്രതികരണം നേടി മുന്നേറുകയാണ്.

Also Watch :