എഎംഎംഎയിൽ നിന്ന് രാജിവെക്കുന്ന കാര്യം ചിന്തിച്ചിട്ടില്ലെന്ന് മോഹൻലാൽ

കൊച്ചി: താൻ എഎംഎംഎയിൽ നിന്ന് രാജിവെക്കുന്ന കാര്യം ചിന്തിച്ചിട്ടില്ലെന്ന് സംഘടനയുടെ പ്രസിഡൻറ് മോഹൻലാൽ. ഇത്തരത്തിൽ പ്രചരിക്കുന്ന വാർത്ത അടിസ്ഥാനരഹിതമാണെന്നും അദ്ദേഹം പറഞ്ഞു. എഎംഎംഎയും വനിതാ സംഘടനായ ഡബ്ല്യു.സി.സി.യിലെ അംഗങ്ങളും തമ്മിലുള്ള ചർച്ചയ്ക്ക് ശേഷം സംസാരിക്കുകയായിരുന്നു അദ്ദേഹം.

രാജിക്ക് ശ്രമിച്ചെന്ന വാർത്ത അടിസ്ഥാന രഹിതമാണ്, നിലവിലെ പ്രശ്നങ്ങൾ പരിഹരിക്കാൻ കഴിഞ്ഞില്ലെങ്കിൽ അതിനെ പറ്റി ആലോചിക്കാമെന്നും മോഹൻലാൽ വ്യക്തമാക്കി. വനിത അംഗങ്ങൾ ചൂണ്ടിക്കാട്ടിയ കാര്യങ്ങളിൽ വാസ്തവമുണ്ട്; ഇക്കാര്യങ്ങൾ ചർച്ചയ്ക്കെടുക്കാൻ വീണ്ടും ജനറൽ ബോഡി ചേരുമെന്നും അദ്ദേഹം കൂട്ടിച്ചേർത്തു.

ദിലീപിനെ അമ്മയിൽ തിരിച്ചെടുത്തതിനെ തുടർന്ന് നാല് നടിമാർ എഎംഎംഎയിൽ നിന്ന് രാജി വെച്ചിരുന്നു.