രാജീവ് രവിയുടെ പൊലീസ് ത്രില്ലര്‍ ‘കുറ്റവും ശിക്ഷയും’!, ആസിഫ് പോലീസ് ഗെറ്റപ്പിൽ വീണ്ടും, ഇത്തവണ ഗൗരവക്കാരൻ!

ആസിഫ് അലിയാണ് ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നത്. കുറ്റവും ശിക്ഷയും എന്നാണ് ചിത്രത്തിന് പേരിട്ടിരിക്കുന്നത്. റിപബ്ലിക് ദിനമായ ജനുവരി 26ന് ചിത്രത്തിൻ്റെ ഷൂട്ടിങ് തുടങ്ങും.

രണ്ട് ഘട്ടങ്ങളിലായി കേരളത്തിലും രാജസ്ഥാനിലുമായാണ് ചിത്രീകരണം നടക്കുക. ഫെബ്രുവരി അവസാനത്തോടെ ചിത്രീകരണം പൂര്‍ത്തിയാക്കുാനാണ് വിഭാവനം ചെയ്തിരിക്കുന്നത്.

പിരീഡ് സ്റ്റോറിയായ 'തുറമുഖ'ത്തിന്റെ പ്രോസ്റ്റ് പ്രൊഡക്ഷന്‍ പൂര്‍ത്തിയാക്കിയി വരികയാണ്. നിവിൻ പോളി നായകനാകുന്ന ബിഗ് ബജറ്റ് ചിത്രത്തിൻ്റെ റിലീസ് തീയ്യതി തീരുമാനമാകുന്നതേയുള്ളൂ.

തൊണ്ടിമുതലും ദൃക്സാക്ഷിയും എന്ന ചിത്രത്തിലൂടെ പ്രശസ്തനായ സിബി തോമസാണ് കുറ്റവും ശിക്ഷയും എന്ന ചിത്രത്തിന് കഥ ഒരുക്കുന്നത്. മാധ്യമപ്രവര്‍ത്തകനും തിരക്കഥാകൃത്തുമായ ശ്രീജിത്ത് ദിവാകരനും സിബിതോമസും ചേര്‍ന്നാണ് തിരക്കഥ ഒരുക്കുന്നത്.

ഫിലിംറോള്‍ പ്രൊഡക്ഷന്‍സിന്റെ ബാനറില്‍ അരുണ്‍കുമാര്‍ വി.ആറാണ് ചിത്രം നിര്‍മ്മിക്കുന്നത്. സണ്ണിവെയ്ന്‍, അലന്‍സിയര്‍, ഷറഫുദ്ദീന്‍, സെന്തില്‍ എന്നിവരും ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിക്കുന്നു.

ആസിഫ് അലി ചിത്രത്തിൽ പോലീസ് ഓഫീസറായാണ് എത്തുന്നത്. മുൻപും ആസിഫ് പോലീസ് വേഷത്തിലെത്തിയിട്ടുണ്ടെങ്കിലും ഈ കഥാപാത്രം ഗൗരവക്കാരനായിരിക്കുമെന്നും റിപ്പോര്‍ട്ടുണ്ട്.

വലിയപെരുന്നാള്‍, തൊട്ടപ്പന്‍, കിസ്മത്ത് എന്നീ ചിത്രങ്ങളിലൂടെ ശ്രദ്ധേയനായ സുരേഷ് രാജനാണ് ചിത്രത്തിൻ്റെ ക്യാമറ കൈകാര്യം ചെയ്യുന്നത്.

ബി.അജിത്കുമാറാണ് ചിത്രത്തിൻ്റെ എഡിറ്റിങ് നിര്‍വ്വഹിക്കുന്നത്. സാബു ആദിത്യനാണ് കലാസംവിധാനത്തിന് ചുക്കാൻ പിടിക്കുന്നത്.

ഫിലിം റോള്‍ പ്രൊഡക്ഷന്‍സ് വിതരണത്തിനെത്തിക്കുന്ന ചിത്രത്തിൻ്റെ സൗണ്ട് ഡിസൈനിങ് നിര്‍വ്വഹിക്കുന്നത് രാധാകൃഷ്ണനും റോണക്സ് സേവ്യര്‍ മേക്കപ്പും സുജിത് മട്ടന്നൂര്‍ കോസ്റ്റ്യൂംസും നിര്‍വ്വഹിക്കുന്നു. ബിനു മണമ്പൂരാണ് പ്രൊഡക്ഷന്‍ കണ്‍ട്രോളര്‍.