'ബാഹുബലി'യിലെ വസ്ത്രങ്ങളൊരുക്കിയത് രാജമൗലിയുടെ ഭാര്യ

'ബാഹുബലി' രണ്ടാംഭാഗം ഇറങ്ങിയതോടെ സിനിമാ പ്രേമികൾ ആവേശത്തിലാണ്. പ്രേക്ഷകരെ ആവേശം കൊള്ളിക്കുന്ന രണ്ടാം ഭാഗത്തില്‍ സംവിധായകൻ രാജമൗലിയോടൊപ്പം നിറഞ്ഞുനില്‍ക്കുന്നുണ്ട് സംവിധായകന്റെ ഭാര്യ രാമയും. പ്രഭാസിനേയും അനുഷ്ക്കയെയും രമ്യ കൃഷ്ണനെയും തമന്നയെയും റാണയേയുമൊക്കെ ചിത്രത്തിലെ കഥാപാത്രങ്ങളാക്കി മാറ്റാനുള്ള വസ്ത്രങ്ങളൊരുക്കിയത് ഇവരാണ്.



ചിത്രത്തിലെ കഥാപാത്രങ്ങളെ ഏറെ തലയെടുപ്പുള്ളവരാക്കിയതില്‍ രാമയുടെ കരവിരുതും ഭാവനയും വഹിച്ച പങ്ക് വലുതാണ്. പ്രശാന്ത് ത്രിപുരനേനിക്കൊപ്പം ചിത്രത്തിലെ വസ്ത്രാലങ്കാരവും ചമയവും നിര്‍വഹിച്ചത് രാമയാണ്. ഹോളിവുഡ് ചിത്രങ്ങളെ വെല്ലുന്ന തരത്തിലുള്ള വസ്ത്രാലങ്കാരമാണ് കഥാപാത്രങ്ങളുടെ പൂര്‍ണതയ്ക്കുവേണ്ടി രാമ ഒരുക്കിയത്. ഇന്ത്യന്‍ പശ്ചാത്തലത്തിലുള്ള കഥയാണെങ്കിലും രാജ്യാന്തര പ്രേക്ഷകരെ കൂടി മനസ്സില്‍ കണ്ടുകൊണ്ടായിരുന്നു വേഷവിതാനങ്ങള്‍.

രാജാ രവി വര്‍മയയുടെ ഛായാചിത്രങ്ങളില്‍ നിന്നുവരെ പ്രേരണ ഉള്‍ക്കൊണ്ടാണ് ദേവസേനയുടെയും ശിവകാമിയുടെയും സാരികളുടെ ഡിസൈൻ പ്രധാനമായും നി‍ർവ്വഹിച്ചത്. മയിലഴകിലുള്ള സാരി ധരിച്ച ദേവസേനയുടെ വേഷം ഏറെ പ്രശംസനേടുകയുമുണ്ടായി. അതുപോലെ തന്നെ വെല്ലുവിളി നിറഞ്ഞതായിരുന്നു കഥാപാത്രങ്ങളുടെ ആഭരണങ്ങള്‍. പ്രഭാസും റാണയും ധരിച്ചത് സ്വര്‍ണപോളീഷില്‍ മുക്കിയ കനപ്പെട്ട വെള്ളി ആഭരണങ്ങളായിരുന്നു. ഇതില്‍ നിന്ന് വ്യത്യസ്തമായ ഡിസൈനിലാണ് ദേവസേനയുടെയും മറ്റും ആഭരണങ്ങള്‍.



യഥാര്‍ഥ ആഭരണങ്ങള്‍ തന്നെ ധരിച്ചാല്‍ കഥാപാത്രങ്ങള്‍ക്ക് പെട്ടന്ന് തന്നെ കഥാപാത്രങ്ങളെ ഉള്‍ക്കൊള്ളാനാവുകയും സീനുകള്‍ക്ക് ഒറിജിനില്‍ ലുക്ക് ലഭിക്കുകയും ചെയ്യും. ക്വാളിറ്റിയുടെ കാര്യത്തില്‍ ഒരുതരത്തിലുമുള്ള വിട്ടുവീഴ്ച പാടില്ലെന്ന് നിര്‍ബന്ധമുണ്ടായിരുന്നു. ഒന്നാം ഭാഗത്തിന് ഈ ആഭരണങ്ങള്‍ക്ക് സ്പോണ്‍സറെ കണ്ടെത്താന്‍ കഴിഞ്ഞിരുന്നില്ല. പക്ഷേ രണ്ടാം ഭാഗത്തില്‍ ചിത്രത്തിന്‍റെ സാധ്യത കണ്ടറിഞ്ഞ് സ്പോണ്‍സര്‍മാര്‍ വന്നു. അമ്രപാലി ജുവൽസുമായി സഹകരിച്ച്‌ ദേവസേനയ്ക്ക് യഥാര്‍ഥ സ്വര്‍ണാഭരണങ്ങള്‍ തന്നെ പണി കഴിപ്പിച്ചു. അഞ്ച് വര്‍ഷമായി രാജമൗലിയും രാമയും ബാഹുബലിക്ക് പിറകെ തന്നെയാണ്.


baahubali2 costume designer
baahubali2 costume designer rama rajamouli