ജയരാജ് സംവിധാനം ചെയ്ത 'ഭയാനകം' ട്രെയിലര്‍ പുറത്തിറങ്ങി

ജയരാജ് സംവിധാനം ചെയ്ത ഭയാനകം സിനിമയുടെ ട്രെയിലര്‍ പുറത്തിറങ്ങി. ജയരാജിനെ ദേശീയ പുരസ്‌കാരത്തിന് അര്‍ഹനാക്കിയ ചിത്രമാണ് ഭയാനകം. തകഴിയുടെ കയര്‍ എന്ന നോവലിലെ ഒരേടാണ് ചിത്രത്തിന്റെ പ്രമേയം. കുട്ടനാടന്‍ ഗ്രാമത്തിലെ പോസ്റ്റ്മാന്റെ ജീവിതാനുഭവങ്ങളിലൂടെയാണ് കഥ സഞ്ചരിക്കുന്നത്.

പോസ്റ്റുമാന്റെ വേഷം അവതരിപ്പിച്ച്‌ രണ്‍ജി പണിക്കര്‍ ആദ്യമായി നായകനാകുന്നുവെന്നതാണ് മറ്റൊരു പ്രത്യേകത. ജയരാജ് തന്നെ തിരക്കഥയും സംഭാഷണവും. ചിത്രത്തിലെ ഛായാഗ്രഹണത്തിന് നിഖില്‍ എസ് പ്രവീണിനും ദേശീയ പുരസ്‌കാരം ലഭിച്ചിരുന്നു. ആശാ ശരത്ത്, ഗിരീഷ് കാവാലം, സബിതാ ജയരാജ്, കുമരകം വാസവന്‍, ബിലാസ്, ഹരിശങ്കര്‍, പുതുമുഖങ്ങളായ വൈഷ്ണവി വേണുഗോപാല്‍, ഗായത്രി എന്നിവരാണ് മറ്റ് അഭിനേതാക്കള്‍.