ബിഗ്ബോസ് വീട്ടിൽ നിന്ന് പുറത്തു വന്ന അർച്ചനയ്ക്ക് പറയാനുള്ളത്

പ്രേക്ഷകരിൽ ആവേശമുയര്‍ത്തി ബിഗ് ബോസ് മലയാളം റിയാലിറ്റി ഷോ വിജയകരമായി മുന്നേറുന്നതിനിടെ പ്രേക്ഷകരുടെ അവസാനഘട്ട വോട്ടിങ് പുരോഗമിക്കുകയാണ്. ഏറ്റവുമൊടുവിൽ അര്‍ച്ചന സുശീലൻ കൂടി പുറത്തായതോടെ സാബുമോൻ, പേളി മാണി, ശ്രീനിഷ്, അരിസ്റ്റോ സുരേഷ്, അതിഥി റായ്, ഷിയാസ് എന്നിവരാണ് അവസാന മത്സരത്തിൽ മാറ്റുരയ്ക്കുന്നത്. അർച്ചന പുറത്തെത്തിയ ശേഷം വീട്ടുകാരെയും സുഹൃത്തുക്കളെയും കണ്ടുമുട്ടി. അതിനിടെ അ‍ര്‍ച്ചന ഫേസ്ബുക്ക് ലൈവിലെത്തി തന്നെ ഇതുവരെ സപ്പോർട്ട് ചെയ്ത എല്ലാവർക്കും നന്ദി പറയുന്നതിനൊപ്പം ബിഗ്ബോസ് ഹൗസിൽ വിജയിക്കണമെന്ന് പ്രേക്ഷകര്‍ക്ക് തോന്നുന്നവര്‍ക്ക് വിലയേറിയ വോട്ട് നൽകിയ വിജയിപ്പിക്കാനും അര്‍ച്ചന ആവശ്യപ്പെട്ടിട്ടുണ്ട്. അ‍ര്‍ച്ചനയെ കാണാൻ ബിഗ്ബോസ് വീട്ടിൽ നിന്നും മുൻപ് പുറത്തായ ദിയ സനയും എത്തിയിരുന്നു.



ബിഗ്ബോസ് എന്ന ആ വലിയ ടൈറ്റിൽ സ്വന്തമാക്കാൻ അര്‍ഹര്‍ ആരാണെന്ന നിങ്ങളുടെ അഭിപ്രായം അത് വോട്ടാക്കി മാറ്റണമെന്നും അര്‍ച്ചന പറയുന്നു. ചിന്തിച്ച് നല്ല രീതിയിൽ തന്നെ വോട്ട് ചെയ്യണമെന്നും അത് പാഴാക്കരുതെന്നും അര്‍ച്ചന. പിൽക്കാലത്ത് നമുക്ക് ബിഗ്ബോസ് വിജയി ആണെന്ന് അഭിമാന പുരസ്സരം പറയാൻ തക്കവണ്ണമുള്ള ആളായിരിക്കണം അത്. അര്‍ച്ചന പറഞ്ഞു.


ഏറെ ശക്തരെന്ന് കരുതിയ പലരും ഷോയുടെ വിവിധ ഘട്ടങ്ങളിലായി വീട്ടിന് പുറത്തേക്ക് പോയത് പ്രേക്ഷകരെ ആശങ്കയിലാക്കിയിരുന്നു. നിലവിൽ ബിഗ് ബോസ് വീട്ടിനുള്ളിലുള്ളവരിൽ പലരും ഷോയുടെ തുടക്കത്തിൽ തന്നെ പുറത്താകുമെന്ന് പ്രേക്ഷകര്‍ കരുതിയിരുന്നവരാണ്. അതു തന്നെയാണ് ഇപ്പോൾ ആരാകും വിജയി എന്നറിയാൻ പ്രേക്ഷകര്‍ ഉറ്റുനോക്കുന്നത്.