ആര്യയ്ക്കെതിരെ പേളി ഫാൻസിൻ്റെ സൈബര്‍ ആക്രമണം

നടിയും ആങ്കറുമായ ആര്യയ്ക്കെതിരെ പേളി ഫാൻസിൻ്റെ സൈബര്‍ ആക്രമണം. മലയാളം ചാനൽ റിയാലിറ്റി ഷോകളിൽ മികച്ചതായി മുന്നേറിക്കൊണ്ടിരിക്കുന്ന ബിഗ്ബോസ് മലയാളം ഷോ അവസാന ഘട്ടത്തോട് അടുക്കുകയാണ്. ഷോയിൽ ഫൈനലിസ്റ്റുകളായി എത്തിയിരിക്കുന്നത് പേളി മാണി, ശ്രീനിഷ്, ഷിയാസ്, അരിസ്റ്റോ സുരേഷ്, സാബുമോൻ എന്നിവരാണ്. ഇവരിൽ തനിക്ക് മികച്ചതെന്ന് തോന്നിയ മത്സരാര്‍ത്ഥി സാബുവാണെന്ന് ആര്യ വെളിപ്പെടുത്തിയിരുന്നു സാബുവിന് പിന്തുണ പ്രഖ്യാപിക്കുകയും ചെയ്തിരുന്നു. ഇതിനെ തുടര്‍ന്നാണ് പേളി ആര്‍മി എന്ന പേളി ആരാധകരുടെ സംഘം ആര്യയുടെ ഫേസ്ബുക്കിൽ ആക്രമണം നടത്തിയത്. സോഷ്യൽ മീഡിയയിലൂടെ ലൈവ് വീഡിയോയിലാണ് ആര്യ തൻ്റെ പ്രിയപ്പെട്ട ബിഗ്ബോസ് താരത്തെ വ്യക്തമാക്കിയത്.

ബിഗ്ബോസ് ഷോ നിരന്തരം കാണാറുണ്ടെന്നും തൻ്റെ ആരാധകര്‍ എപ്പോഴും അതിനെ പറ്റിയുള്ള അഭിപ്രായം ചോദിക്കാറുമുണ്ടെന്ന് ആര്യ വീഡിയോയിൽ പറഞ്ഞിരുന്നു. ഇത്തരത്തിൽ വീഡിയോയിൽ ഒരു ചോദ്യത്തിന് ഉത്തരമായാണ് സാബുവാണ് ഇഷ്ടപ്പെട്ട മത്സരാ‍ത്ഥി എന്നത്. തുടര്‍ന്നാണ് കുറേ പേരിൽ നിന്നും പ്രകോപനപരമായ കമൻ്റുകൾ വന്നു തുടങ്ങിയത്, അവര്‍ തന്നെ പേളി ഹേറ്റര്‍ എന്ന് വിളിച്ചെന്ന് ആര്യ വ്യക്തമാക്കി. അവര്‍ പേളി ആരാധകരായിരുന്നുവെന്നാണ് ആര്യ ആരോപിക്കുന്നത്. തനിക്ക് ഇവരിൽ നിന്ന് ഒട്ടേറെ ഭീഷണികൾ ലഭിച്ചിട്ടുണ്ടെന്നും ആര്യ ചൂണ്ടിക്കാട്ടി.

ആര്യ പേളിയെ താറടിക്കാൻ ശ്രമിക്കുകയാണെന്നും പേളിയോട് ആര്യയ്ക്ക് അസൂയയാണെന്നും വരെ പലരും കമൻ്റ് ചെയ്തു. ബിഗ് ബോസ് മത്സരാര്‍ത്ഥികളെ പിന്തുണയ്ക്കാനായി മാത്രം സൃഷ്ടിക്കപ്പെട്ട വ്യാജ പ്രൊഫൈലുകളാണോ അതെന്നും ആര്യ സംശയിക്കുന്നു.