കുറഞ്ഞ ചെലവിലൊരുങ്ങുന്ന 'പോരാട്ടം'; ഫസ്റ്റ് ലുക്ക് പോസ്റ്റർ

കൊച്ചി: കോടികളുടെ തിളക്കത്തിൽ മലയാള സിനിമ കിതക്കാതെ കുതിമ്പോൾ ലോകത്തിലെ ഏറ്റവും ചെലവു കുറഞ്ഞ സിനിമയെന്ന ഖ്യാതിയോടെ എത്തുന്ന 'പോരാട്ട'ത്തിന്‍റെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു. 25,000 രൂപയിൽ ഒരുക്കിയ മുഴുനീള ഫീച്ചർ ഫിലിം ആയ പോരാട്ടത്തിൽ നവജിത്ത് നാരായണനും നടി ശാലിൻ സോയയുമാണ് മുഖ്യ കഥാപാത്രങ്ങളായെത്തുന്നത്. സംവിധായകന്‍ ബിലഹരിയും സംഘവും അതീവ രഹസ്യമായിട്ടായിരുന്നു സിനിമയുടെ ചിത്രീകരണം പൂര്‍ത്തിയാക്കിയത്. മൂത്തോൻ, മോഹൻലാൽ, ആഭാസം എന്നീ സിനിമകളുടെ ഡിസൈനർ പവി ശങ്കറാണ് പോരാട്ടം പോസ്റ്റർ ഡിസൈൻ ചെയ്തിരിക്കുന്നത്. സുഹൃത്തുക്കളുടെ സഹായത്തോടെ പ്ലാന്‍ ബി ഇന്‍ഫോടെയ്ന്‍മെന്‍റിന്‍റെ ബാനറിലാണ് ചിത്രം ഒരുക്കിയിരിക്കുന്നത്.




കേവലം 15 ദിവസങ്ങള്‍ മാത്രമാണ് പോരാട്ടത്തിന്‍റെ ചിത്രീകരണത്തിനെടുത്തത്. സംവിധായകന്‍റെ ബന്ധുക്കളുടെ വീടുകളിലാണ് ചിത്രം പൂര്‍ണമായി ചിത്രീകരിച്ചത്. നവജിത്തിനും നായിക ശാലിന്‍ സോയക്കും അഭിനയത്തിൽ മുൻപരിചയമുണ്ടായിരുന്നത് ഇതിനെ ഏറെ സഹായിച്ചു. ബാക്കി എല്ലാ നടൻമാരും പുതുമുഖങ്ങളായിരുന്നു. തിയേറ്റര്‍ ആര്‍ട്ടിസ്റ്റായ നവജിത്ത് എന്നും എപ്പോഴും, എന്നു നിന്റെ മൊയ്തീന്‍ തുടങ്ങിയ ചിത്രങ്ങളില്‍ ശ്രദ്ധേയമായ വേഷങ്ങള്‍ കൈകാര്യം ചെയ്തിട്ടുണ്ട്. കമലിന്‍റെ ആമിയില്‍ ചങ്ങമ്പുഴയുടെ വേഷം അവതരിപ്പിക്കുന്നത് നവജിത്താണ്.

ശരിക്കും പോരാട്ടം തന്നെയായിരുന്നു സിനിമയുടെ ചിത്രീകരണം. വീട്ടില്‍ ഉണ്ടാക്കുന്ന ഭക്ഷണം കഴിച്ചു, ഇതില്ലാപ്പോള്‍ പട്ടിണി കിടന്നു. ക്യാമറാമാന്‍ അടക്കമുള്ള സാങ്കേതിക പ്രവര്‍ത്തകരെല്ലാം പ്രതിഫലം വാങ്ങാതെയാണ് പ്രവര്‍ത്തിച്ചത്. ശ്രീരാജ് രവീന്ദ്രന്‍ കാമറ ചെയ്യുന്നതിനോടൊപ്പം , നിര്‍മാതാക്കളില്‍ ഒരാള്‍ ആകുന്നു. ശ്രീരാജ് ആ സമയം വാങ്ങിയ മാര്‍ക്ക് 4 ല്‍ ഫോര്‍കെ ക്വാളിറ്റിയില്‍ ആണ് ചിത്രം ഷൂട്ട് ചെയ്തത്.

ടെക്‌നിക്കല്‍ ക്രൂവില്‍ എല്ലാവരും തന്നെ ഒരു രൂപ പ്രതിഫലം വാങ്ങാതെയാണ് ചിത്രത്തിനൊപ്പം സഹകരിച്ചത്. മാസങ്ങളായി ചിത്രത്തിന്‍റെ എഡിറ്റിങ്, കളറിങ് എന്നിവയില്‍ മാത്രം ശ്രദ്ധ കേന്ദ്രീകരിച്ചിരിക്കുന്ന ആകാശ് ജോസഫ് വര്‍ഗീസ് , സംഗീത സംവിധായകന്‍ മുജീബ് മജീദ്, മഹേഷിന്‍റെ പ്രതികാരം , റാണി പദ്മിനി തുടങ്ങിയ ചിത്രങ്ങളില്‍ സൗണ്ട് ഡിസൈന്‍ നിര്‍വ്വഹിച്ച രജീഷ് കെ. രമണന്‍ , വിദേശത്തിരുന്നു സബ്‌ടൈറ്റില്‍സ് പൂര്‍ത്തിയാക്കിയ ശ്യാം നാരായണ്‍ എന്നിവരടക്കമുള്ള സിനിമ സ്വപ്നം കാണുന്ന ഒരു കൂട്ടം ചെറുപ്പക്കാരുടെ അധ്വാനത്തിന്‍റെ ഫലമാണ് ഈ സിനിമ. ചലച്ചിത്ര മേളകളില്‍ റിലീസ് ചെയ്യാനാണ് സംവിധായകന്‍റെയും കൂട്ടരുടെയും തീരുമാനം.

Bilahari's film 'Porattam' low budget movie: First look poster is out

Director Bilahari's New film 'Porattam' low budget movie: First look poster is out