ബോളിവുഡ് സംഗീത സംവിധായകന്‍ വാജിദ് ഖാന്‍ അന്തരിച്ചു

മുംബൈ : ബോളിവുഡിൽ നിരവധി ഗാനങ്ങളൊരുക്കി ശ്രദ്ധേയരായ സാജിദ്-വാജിദ് ഇരട്ട സംഗീത സംവിധായകരിൽ ഒരാളായ സംഗീത സംവിധായകന്‍ വാജിദ് ഖാന്‍ (42) അന്തരിച്ചു. വൃക്ക രോഗത്തെത്തുടര്‍ന്ന് മുംബൈയിലെ ആശുപത്രിയില്‍ ചികില്‍സയിൽ കഴിയവേയാണ് അന്ത്യം സംഭവിച്ചിരിക്കുന്നത്. കഴിഞ്ഞ ദിവസം കൊവിഡ് ടെസ്റ്റ് പോസിറ്റീവായിരുന്നു.

Also Read: നീതിപീഠം ബാക്കിയുണ്ട്, അടിവരയിട്ട് 'പൊൻമകൾ വന്താൽ' റിവ്യൂ

ഗായകനായ സോനു നിഗമാണ് ഇൻസ്റ്റഗ്രാമിൽ വാജിദിന്‍റെ മരണം സ്ഥിരീകരിച്ചുകൊണ്ടുള്ള പോസ്റ്റ് പങ്കുവെച്ചത്. 'എന്‍റെ സഹോദരൻ വാജിദ് ഞങ്ങളിൽ നിന്നു വേര്‍പിരിഞ്ഞു', എന്നാണ് സോനു കുറിച്ചിരുന്നത്. വൃക്ക രോഗത്തെ തുടര്‍ന്ന് വൃക്ക മാറ്റിവയ്ക്കൽ നടത്തിയെങ്കിലും വീണ്ടും പ്രശ്നങ്ങള്‍ ഉണ്ടായതിനെതുടര്‍ന്ന് ആശുപത്രിയിൽ എത്തിക്കുകയായിരുന്നു. നാല് ദിവസമായി വെന്‍റിലേറ്ററിൽ കഴിഞ്ഞുവരികയായിരുന്നു.

സഹോദരന്‍ സാജിദുമായി ചേര്‍ന്ന് നിരവധി ബോളിവുഡ് സിനിമകളില്‍ സംഗീത സംവിധാനം ചെയ്തിട്ടുണ്ട്. 1998ൽ സൽമാൻ ഖാൻ നായകനായ പ്യാർ‍ കിയാ തോ ഡര്‍നാ ക്യാ എന്ന സിനിമയിൽ സംഗീതമൊരുക്കിക്കൊണ്ടായിരുന്നു തുടക്കം. വാണ്ടഡ്, ഹെലോ ബ്രദര്‍, ചോരി ചോരി, മുജ്സേ ശാദി കരോഗി, ഏക്താ ടൈഗര്‍, പാര്‍ട്നര്‍, ദബാങ് തുടങ്ങിയവ വാജിദ് സംഗീതമൊരുക്കിയ പ്രധാന ചിത്രങ്ങളാണ്.

Also Read: 'ഈശ്വരാ ഇതൊരുപാട് പേരുണ്ടല്ലോ'; അക്ഷരാർത്ഥത്തിൽ അഹാനയെ പോലും ഞെട്ടിച്ച 'മ്യാരക എഡിറ്റിങ്ങ്!'

ബാബുൽ സുപ്രിയോ, പ്രിയങ്ക ചോപ്ര, സലിം മര്‍ച്ചന്‍റ് തുടങ്ങി നിരവധിപേര്‍ വാജിദിന്‍റെ മരണത്തിൽ അനുശോചനം രേഖപ്പെടുത്തി കുറിപ്പ് പങ്കുവെച്ചിട്ടുണ്ട്. 'വാജിദ് ഭായിയുടെ ചിരിയാണ് എനിക്ക് ഒരിക്കലും മറക്കാൻ കഴിയാത്തത്, എപ്പോഴും ചിരിക്കുമായിരുന്നു, ഏറെ നേരത്തെയായിപോയി പോയത്, മരണത്തിൽ ദുഖാര്‍ത്തരായി കഴിയുന്ന കുടുംബാംഗങ്ങള്‍ക്കും എല്ലാവര്‍ക്കും എന്‍റെ അനുശോചനം അറിയിക്കുന്നു', പ്രിയങ്ക കുറിച്ചിരിക്കുകയാണ്.

Also Watch :