ബോളിവുഡ് നടിയുടെ കാറിടിച്ച് യാത്രക്കാരന് ദാരുണാന്ത്യം

ഗോവ: ബോളിവുഡിൽ ഐറ്റം ഡാൻസിലൂടെ ശ്രദ്ധേയയായ നടി സറീന്‍ ഖാന്‍റെ കാറിടിച്ച്‌ ബൈക്ക് യാത്രക്കാരന് ദാരുണാന്ത്യം. ഗോവയിലെ മപുസ സ്വദേശിയായ നിതേഷ് ഗോരാല്‍ (31) ബൈക്കിൽ സഞ്ചരിക്കുന്നതിനിടെ കാറിടിച്ച് മരണപ്പെട്ടത്. ഗോവയുടെ പടിഞ്ഞാറ് ഭാഗത്തായുള്ള ബീച്ചിന് സമീപത്തെ അഞ്ജുന ഗ്രാമത്തില്‍ വച്ച് ബുധനാഴ്ച രാത്രിയായിരുന്നു സംഭവം.

അപകടം നടന്ന സമയത്ത് സറീന്‍ ഖാനും ഡ്രൈവര്‍ അലി അബ്ബാസും കാറിലുണ്ടായിരുന്നു. സംഭവത്തില്‍ അന്വേഷണം നടത്തി വരികയാണെന്ന് അഞ്ജുന പോലീസ് അറിയിച്ചതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്. നടിയും ഡ്രൈവറും ചേര്‍ന്ന് ഇയാളെ ഉടൻ അടുത്തുള്ള അസിലോ ആശുപത്രിയില്‍ പ്രവേശിപ്പിച്ചെങ്കിലും മരണം സംഭവിച്ചു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

ബോളിവുഡിൽ ഐറ്റം ഡാൻസറായി എത്തിയ താരം സല്‍മാന്‍ ഖാന്‍റെ ചിത്രമായ വീറിൽ നായികയായതോടെയാണ് തിളങ്ങിയത്. പിന്നീട് ഹേറ്റ് സ്റ്റോറി, ഹൗസ് ഫുള്‍ 2 തുടങ്ങിയ ചിത്രങ്ങളുടേയും ഭാഗമായിട്ടുണ്ട്.